No.3833/2021-2022
Aizawl the 27th, January' 2022: Vawiin chawhma khan Dr.K. Pachhunga, MLA leh Vice Chairman, Bamboo Development Board, Government of Mizoram ni bawk chuan a bial chhung Hrangchalkawn, Lunglei ah Urban Primary Health Centre a hawng. UPHC hawnna ah hian Medical Department thawktute, Hrangchalkawn khawtlang hruaitute leh Party aiawh te an tel a ni.

UPHC hawnna inkhawm hi Dr.L.C. Liana, Chief Medical Officer, Lunglei in kaihhruaiin Dr. K.Pachhunga chuan Covid-19 hrileng buai karah UPHC Building hawn theiha awm hi lawmawm tiin a hmunhma lo buaipui tu Hrangchalkawn khawtlang hruaitute chungah pawh lawmthu a sawi a ni. Lunglei ah Civil Hospital tha tak awm mah se a panna te a lo hlat deuh avangin UPHC hi Hrangchalkawn leh a bul hnai khua te tan a tangkai takzet dawn a ni tiin Highway bula awm anih avang in chhimlam District dang mipui tan pawh a tangkai tur thu a sawi bawk. UPHC ah hian Doctor, Nurse leh thawktu dang tha tak tak an awm thu sawiin Doctor te, Nurse te leh thawktu dangte Covid 19 hri dona a hmalakna leh an inpekna ah te an chhuanawm takzet a ni, a ti bawk. A bial chhunga sorkar hmasawnna te pawh sawilangin JICA sum hmanga Hrangchalkawn to Lawngtlai Highway laih mek leh Hrangchalkawn via Luangmual to Chhumkhum Highway NHIDLC in an laih mek ah te hmalakna a kal mek bakah, World Bank kawng Chhumkhum to Chawngte pawh zawh tawh niin, Sorkar laipui hmalakna in tui harsa zual khua sawm (10) ah tui supply tha zawk a awm theih nan solar water pump bun tura hmalak mek niin zirna in pawh tih hmasawn tura hmalak zel a nih thu te a sawi bawk.

Pu H. Lalthangliana, Health Educator, CMO Office, Lunglei in technical report pe in UPHC Building hi cheng nuai sawmsarih pasarih (77 Lakhs) senga sak niin chhawng hnih, a dung 61.5 ft leh a vang 20 ft a ni a. A chhungah hian Accounts room, pharmacy room, condemnation room, Maternity ward & labour room attach toilet awm, Minor OT leh dressing room attach toilet awm, nursing station, mipa leh hmeichhe toilet, kitchen, sterilization room, general store, medical officer room, laboratory, khum pahnih ve ve awmna mipa ward leh hmeichhe ward leh waiting room te a awm a ni.