No.3834/2021-2022

Aizawl, the 27th January 2022: Vawiin khan School Education Director Pu James Lalrinchhana chuan Govt. Mizo High School, Aizawl a Atal Tinkering Laboratory(ATL) siam thar a hawng.

School Education Director chuan he hunah hian tunlai khawvel hmasawnna nasa tak karah Science lama tuihalna zirlaiteah kan tuh a ngai a, hetiang atana Laboratory changkang leh tunlai thiamna hmanga thuam Laboratory tha tak Govt. Mizo High School in an nei chu lawmawm a tih thu a sawi. He School atang hian mithiam tha tak tak scientist-te an lo chhuak belh zel dawn a ni a ti a. Director chuan zirlaite chuan nakina khawvel nunphung rawn inherchhuak zel tur hi an hmuh thiam a ngai a, chutiang anih loh chuan hmasawnna kan umpha ngai dawn lo a ni a ti.

Zirlaite hmasawn nan regional competition te pawh buatsaih theih nise a duh thu a sawi a. Zrlaite chu midangte umtu ni ringawt lova hmahruaitu nih tum turte, hriatna leh thiamna tak tak nei tur leh chutiang atana he laboratory hawn thar chu hmang tangkai turin a fuih a ni.

Hawnna inkhawm tawi hi ATL Lab-ah buatsaih a ni a, Pu Hmingchungnunga, Headmaster in a kaihruai a, Miss Lalrinawmi Teacher In Charge ATL chuan Report tawi a pe. Atal Tinkering Laboratory hi NITI Aayog, Govt. of India Flagship Programme pakhat Atal Tinkering Laboratory (ATL), Atal Innovation Mission (AIM) in a kalpui a ni a. Cheng nuai 10 hmangin din a ni a, a hnuah cheng nuai 2 zel, kum tin hmuh chhunzawm theih tur a ni a, chumi nen chuan a project pumpui hian cheng nuai 20 a keng a ni. Robtech Pvt. Ltd. leh Symphony Explorer Pvt. Ltd. ten he projet hi an enkawl a. India ramah School 9500 leh Student nuai 75 ten an chhawr dawn a ni.

Vawiina ATL thar hawnnaah hian Govt. Mizo High School-a thawk Principal, Headmaster, zirtirtute leh zirlai thenkhatte an tel a, Zirlai naupang ten he Lab a?anga an thiam thar te chu an entir nghal a ni.