No.1175/2021-2022

 Aizawl, 30^th June, 2021 :  Vawiin khan Health Minister Dr. R. Lalthangliana hovin SAD Conference Hall, MINECO-ah Mizorama COVID-19 hri kaite enkawl dan chungchang sawiho a ni a. He hunah hian DIPR Minister Pu Lalruatkima, Chief  Secretary Pu Lalnunmawia Chuaungo, Health Secretary Pu R. Lalramnghaka, Health department hotu pawimawhte bakah ZMC a damlo enkawltu daktawrte, Indian Medical Association,  Non-Government Hospital Association of Mizoram, Association of Physicians leh Aizawl Civil Hospital aiawhte an tel a ni.

Health Minister Dr. R. Lalthangliana chuan Mizoramah COVID-19 hri kai kan la pun belh zel rual hian kan ngaih pawimawh ber tur pakhat chu hri kaite nunna chhanhim  a ni a, daktawrte leh healthcare frontline workers ten theihtawp chhuaha tha leh zung tak meuh senga an thawh avangin Pathianin an thawhrimna mal a sawm a, State dangte nen khaikhin chuan kan dinhmun a la ziaawm hle a ni, a ti a. nunna chhan tura an thawhnaah lawmawm a tih thu sawiin, tha thlah lova theihtawp chhuaha tang fan fan turin a chah a, Mizoram mipuiten an chungah rinna an nghat a ni, tih a hrilh a ni.

ZMC daktawrte chuan damlo an enkawl dan leh an buaipui dante an sawi a, damlote an enkawlna kawnga damdawi an mamawh ang chi sawrkara an thlente rang taka ngaihtuah sak an nih avanga lawmthu sawiin, damdawi chan har leh man to tak takte sawrkarin a chah thlen sak chu an lawm tak zet tih an sawi. Tun dinhmunah a hma aiin damlo na zual enkawl ngai an tlem tawh tih tarlangin damlote enkawlna tur bungrua leh hmanraw chi hrang hrangah thlaphanna tur a awm rih loh thu an sawi a, RT-PCR kit 7500 vel an la neih thu leh tunah hian an chah belh leh mek thu an tarlang bawk.  ZMC-a COVID-19 hri kaite enkawlna tur ward thar khum 30 awmna chu an hman tan tawh thu sawiin, tun dinhmunah khum 277 a awm mek thu an tarlang a, ward dang 1 khum 30 awmna pawh kar hnih chhungin an peihfel leh hman an inrin thu an tarlang bawk.

COVID-19 hrin kaite zingah raipuarte an ngaihtuahawm bik tih vawiin meetingah hian tarlan a ni a, raipuarte chu co-morbid anga ngaih an nih nghal a, an taksa in natna a do theihna (immune response) a chak loh bik avangin an na zual hma bik a, mipangngai aia an thisen a khal/khang duh bik bawk avangin an fimkhur hle a ngai tih sawi a ni. Raipuarte tan COVID-19 vaccine lak thuai a that thu sawi a ni a, hemi chungchangah hian India rama damdawi lam mithiamte ngaihdan sawrkarin a lak tawh thu tarlan niin, nimin lawkah Central sawrkar pawh an dawr tih tarlan a ni a, Central sawrkar chuan reilote chhung lo ngaichanga formal communication lo nghak turin an rawn chah tih thu tarlan a ni bawk.

ZMC ah COVID-19 hri kai raipuar mi 30 admit tawh an nih thu tarlan niin, an zinga 80% chu kum 20-34 in kar an ni a, a tam ber hi nau thla 8-9 inkar pai niin, an vai deuhthaw hian ICU ah dah nghal an ni. COVID-19 positive nau chunga thi mi 4 an awm tawh thu tarlan a ni a, ZMC a raipuar admit zinga 6.7% in nunna an chan a, COVID-19 hri kai dangte zinga 2.2% in nunna an chan a ni. Raipuarte himna ngaih pawimawh a nih vangin District Hospital zawng zawngah COVID-19 hri kai raipuarte nau neihna tur a bika siam make-shift labour room siam tawh a ni a. Aizawlah raipuar COVID-19 hri kaite enkawlna tur bik ruahman mek a ni bawk.

COVID-19 damdawi mumal tak a la awm loh avangin damdawi lei kawngah mipuite fimkhur se an duh thu sawilan a ni a, hemi atan hian inkaihhruaina mumal tak siam a tul thu tarlan a ni bawk.

COVID-19 hri kaite leh hri kailo mipuite pawh taksa rim lutuk lova insawizawi emaw chet kual emaw a pawimawh thu sawi a ni a, third wave lo thleng tura sawi a nih avangin Mizoram State Health Care Scheme hnuaia inziaklut lote tan inziahluh a pawimawha an hriat thu leh, hmun danga Health Insurance ti theite pawhin a scheme a zira a theihna ang angah insurance policy ngaihven se a that thu tarlan a ni.

Meetingah hian June ni 28, 2021 thleng khan Mizoramah vaccine dose 555286 pekchhuah tawh a nih thu tarlan a ni a. First dose la mi 500990 leh awmin full dose la mi 54296 an awm tawh a ni. Electoral roll thar ber atanga chhutin Mizoramah vaccine la thei (kum 18 chunglam ) mi 775106 an awm a, heng zinga mi 500990 (65%) hian vaccine an la tawh a ni. Vaccine first dose pek hmabak hi mi 264116 la awm anga chhut a ni.