No.1174/2021-2022

Dated Champhai, the 29th June, 2021: Vawiin khan Health & Family Welfare Board Vice Chairman Dr. Z.R Thiamsanga, MLA, Medical Operational Team (MOT) Chairman ni bawk hovin Champhai DC Conference Hall-ah Covid-19 chungchanga hmalakna leh tul dang pawimawh relin meeting neih a ni.

Dr. Z.R Thiamsanga chuan Covid-19 hrileng thawh thumna lo thleng tur laka inpuahchahnate enfiaha, ramri dep hmun pawimawh tak Champhai District-a hmalaknate enpui tura lokal a nih thu sawiin, Covid-19 hrileng do kawnga Champhai District-a hmalakna a hmuh leh vantlanga hrileng darh huk awm lova Community spread dangchah a ni thei chu fakawm a ti a. Hrileng thawhhnihna chu inkaichhawn chak leh langchhuak awlsam zawk a nih thu sawiin, hrileng laka kan damdawi neih that ber chu hmaituam, kut silfai leh midangte hlata awm fo hi a ni, a ti.

Covid-19 hrileng do kawngah sawrkarin theihtawp chhuaha hma a lak zel thu sawiin, khum 150 awmna ZMC chu khum 247 awm theihna a siam a nih thute, heng bakah hian  60 dang siam belh turah 30 te peihfel a nih tawh thu leh 30 dangte buatsaih mek a nih thu a sawi a. A tira ICU awm zat ICU pangngai leh surgical ICU belhkhawm 13 awm thin chu 34 thlenga tihlen a ni a, ZMC ah naupang ICU tur Paediatric ICU buatsaih mek a ni, a ti bawk. Hri danna vaccine pek chhuah kawngah sawrkarin theihtawp a chhuah mek zel thu leh hri danna la tura tihten tha taka an lak chu sawrkar duhdan a nih thu sawiin, hridanna lak chu a him a, hei hian hri lakah nasa takin min veng thei a ni tiin, hri danna la theuh turin mipuite a sawm a ni.

Thawhhona tha tak avanga Covid-19 hrileng lungrual taka do let ani chu chhuanawm a tih thu sawiin, LLTF/VLTF, NGO, Kohhran, sawrkar leh mipuite tanrualna avangin State dang khaikhinin dinhmun tha zawka kan awm theih phah thu leh, tha thlah lova beih chhunzawm zel a tul thu a sawi a. Covid-19 damlo enkawl dan chungchangte mithiam ten an vil reng a, endik hna leh hnuchhuite a theih chen chenah ngawrh taka kalpui thin niin, a duh duhte in test theihna tur Testing Kiosk te hmun hran hranah siam a ni, a ti a. Champhaiah tuna TrueNat Quattro khawl hman mek bakah TrueNat Quattro khawl dang pakhat bun belh leh tuma ruahmanna siam a nih thu a sawi bawk a. District Hospital inpuahchahnate tha a tih thu leh Covid-19 hrileng thawh thumna turah thahnemngai taka inpuahchah lawk a tul thu sawiin, mamawh an neih angahte theihtawp chhuahpui sawrkarin a inhuam reng thu a sawi bawk.

Champhai District Bawrhsap Pi Maria C.T Zuali chuan hrileng thawh thumna thleng leh mai turah hmalakna hrang hrangte kalpui a nih thu sawiin, Oxygen regulator 50 leh TrueNat testing kid DDMA kaltlanga lei tumte, khawpui chhunga Kohhran Hall 6 a khum 116 te Covid hrikai dah theihna tura biakfel an nih tawh thu a sawi a. PMKVY Home Health Aide hnuaiah volunteer mi 42 te medical training pek an nih thu leh, Mission Foundation Movement nena tangkawpin District Hospital behchhanin General Duty Assistant training tur thlante training pek thuai tum a ni, a ti bawk.

Addl. DC Pu Henry C.Lalrawnkima hnen tangin Covid hrileng dona kawnga tanpuina sum hmuh zat leh hman dan kimchang report ngaihthlak a ni a. Dr. R.Lianmawia CMO hnen atangin Vaccine pek kalpui dan ngaihthlak niin, nimin thlengin Champhai District ah kum 18-44 inkar mi 13,586, 45-59 inkar mi 7,982 leh kum 60 chung lam mi 7,529 te pek tawh an ni. Dr. Zatluanga, DMS Champhaiin District Hospital Champhai inpuahchahnate tarlangin, Surgical block chhungah makeshift OT leh labour room,  Paediatric Ward-te siam mek niin, 500 litre per minute Oxygen generating plan siam mek a nih thu a sawi bawk.

Thukhawm chuan kum 18 chin chunglam vaccine la thei tur ten kim taka vaccine an lak vek theihna tura hmalak zel nise a ti a. Covid-19 laka himna tura tih makmawh hrang hrangte uar zawka inhrilhhriat nise tiin,   ramri a duty post siamte nakin zela chhawr tangkai theih tura cheithat tha tih a ni a. Covid hrileng karah natna dang enkawl ngaite ngaipawimawh chung zela hmalak thin nise tih leh security chungchangte sawiho a ni bawk.

Vawiin chawhma khan Health & Family Welfare Board Vice Chairman Dr. Z.R Thiamsanga chuan District Hospital Champhai Complex-ah loh theih loha Hospital-a damlo awmpui ngai leh miharsa zawk khawpui pawna mite tana buatsaih Khualbuk siam a hawng bawk. Meeting zawh hnu hian a bial chhung Zote khua tlawhin VLTF te hnenah Rs 10,000/-, Silpaulin, Hand sanitizer leh Face mask-te a hlan bakah, VLTF member ramri venga duty rul chuk tuar Pu Lalhundika, Zote Branch YMA Vice President chu Rs 1,000/- in a kan bawk.