No.4978/2020-2021

Vawiin chawhnu khan SAD Conference Hall, MINECO-ah Mizoram chhunga COVID-19 hri kai hmuhchhuahte enkawlna tur hmun, a bikin Covid Care Centre (CCC) dinhmun thlirho a ni a. Health & Family Welfare Minister Dr. R. Lalthangliana'n he hun hi kaihruaiin, Medical Operational Team on COVID-19 Leader Dr. ZR Thiamsanga, Chief Secretary Pu Lalnunmawia Chuaungo bakah Commissioner & Secretary, UD&PA, Health Secretary, Home Secretary, E-in-C PWD, PHED leh P&E, AMC Commissioner. Mizoram Pollution Control Board hotute leh Health & Family Welfare Department hotute an tel.

Thlirhona hunah hian tun dinhmunah Mizoram chhunga district hrang hrangah civil mi COVID-19 positivete enkawlna tur Covid Care Centre (CCC) puan fel tawh 33 a awm thu tarlan a ni a, district tina civil mi COVID-19 positive enkawlna tur CCC awm mek zat leh damlo enkawl theih tur zat chu hetiang hi a ni :

 Vawiin thukhawm chuan district hrang hrang dinhmunte uluk takin an thlir a, tun dinhmunah chuan Aizawl district tih loh chu ngaihtuawm lutuk lo niin lang mahse a tul anga CCC atana hman tur dap zui zel a pawimawh an ti a. Aizawl district, a bik takin Aizawl khawpui leh a chhehvel hnaivaiah CCC tur ngaihtuah belh a tul hle a hriat niin a tlem berah mi 2500 vel tal vawikhata enkawl theihna tur CCC ngaihtuah a tulin an hria a, hemi atana hmun remchang vauchher deuh an neihte chu a rang lama enfiah turin an rel a, sawrkar building an chhinchhiah lawkte chu department thlan bika official-te bakah building awmna hmun Village/Local Level Task Force-te nen enho thin nise an ti a, chutiang bawkin kohhran thenkhat leh YMA branch thenkhat pawh rawn pen chhuak tanin an hmunhmate CCC atan hman an phal thute pawh hriat a nih tawh thu sawi a ni a, heng hmunhmate pawh hi mipuite tan ahim tawk leh tawkloh endika finfiah turin sawrkar miruatte bakah a hmunhma neitu kohhran, YMA te nen enho zel nise an ti a ni.

CCC chu daktawr leh nurse ten an awmchilh reng thin avangin leh sawrkarin inkaihhruaina mumal tak a duan avangin mipuite tan ngaihthat lohna tur a awmloh thu tarlan a ni a. CCC atana ruatfel tawh, a hmunhma chei that la ngaite pawh rang taka tihfel zung zung a nih theih nan ruahmanna siam a ni bawk. Heng bakah hian Quarantine Centre atana hman mek thenkhatte CCC atana thlak dan tur pawh sawiho a ni.

Vawiin thukhawm hian Quarantine Centre leh CCC a bawlhhlawh/hnawmhnawkte thenfai chungchangah sawrkar laipuiin inkaihruaina dan a siamte leh Mizoram chhunga harsatna kan tawhte sawiho a nih hnu ah, Health & Family Welfare department, UD&PA department leh Aizawl Municipal Corporation hotuten a rang lama sawihona hun neia, tun aia tha zawk leh felfai zawka heng hnawmhnawkte senghawi leh sawngbawl a nih dan tur ruahmanna siam turin an ti a ni.