No.1357/2021-2022

Aizawl, 12th July, 2021 : Vawiin khan SAD Conference Hall, MINECO ah Mizorama COVID-19 hripui leng mek dona kawnga ngaihtuah ngai thil pawimawh tak tak sawiho a ni a, he hun hi Health & Family Welfare Minister Dr. R. Lalthangliana'n kaihruaiin, MOT Chairman Dr. ZR Thiamsanga, MLA, AMC Mayor Pu Lalrinenga Sailo, Chief Secretary Pu Lalnunmawi Chuaungo bakah COVID-19 dona kawnga hmalatu department hrang hrang H&FW, UD&PA, DM&R, G&MR, AMC, Aizawl DC leh Indian Medical Association aiawhte an tel.

Vawiin meetingah hian COVID-19 hri kaite enkawlna BSUP CCC, Durtlang chungchang sawiho a ni a. BSUP, Durtlanga Block pathum kum 2019 July ni 2 khan a chhaka leiminin a tichhia a, nunna chan 3 lai an awm a, Mizorama COVID-19 hri a hluar hmasak nikum October thla atang khan CCC atan BSUP Block la ding thate hi hman niin, damlo mi 500 chuang dah theihna a ni. Amaherawhchu, mithiamten an zirchian hnuah a chhak lamah lei tawlh thei a la awm avangin fur lai chuan luah loh a tha zawka an hriat avangin BSUP CCC, Durtlang hi tihruah a ngai an ti a. CCC dang zawn a tul avangin uluk taka sawiho a nih hnuah AMC Mayor kaihhruaiin UD&PA, DM&R, G&MR, Aizawl DC, PHED, PWD, P&E leh Health department hotuten naktuk zingah BSUP hi an tlawh ang a, hemi bakah hian CCC atana hman theih tur hmun hrang hrang hual lawkte an enthlithlai nghal dawn bawk a ni.

COVID-19 hri kai an pun belh zel avangin Dedicated COVID Hospital (DCH), SRHF-ZMC chu a khat hneh hle tih meetingah hian tarlan a ni a, tun dinhmunah COVID Ward 7, khum 237 awmna leh ICU khum 34 awmin, July ni 1 – 12 inkar khan chawhrualin COVID Ward-ah nitin damlo mi 262 an awm a, vawiin (July ni 12) hian damlo 302 an awm a ni. ICU ah July ni 1 – 12 in kar hian chawhrualin nitin mi 36 enkawl an ni a, vawiin (July ni 12) hian damlo 37 enkawl an ni. ZMC tih thawlna tura DCHC, MRB Head Office, MINECO, khum 50 awmna chu a khat reng tawh a, damlo serious lote chu CCC leh CCCC ah te sawn chhuah thin an ni. DCHC siam belh tura ruahmanna siam a ni a, Kulikawn Hospital chu tuna damlo enkawl lai mekte Civil Hospital lamah sawn chhuah a, COVID-19 hri kai enkawl uluk ngai bikte awmna tura ruahman a ni.

Thawktu indaihlohna a nasat thu tarlan niin ZMC a volunteer thawk MCON a B.Sc (Nursing) final year leh Health & Wellness officer mi 40 vel chu an exam a hun tawh avangin an chawlh a ngai a, hei bakah hian COVID Ward khum 30 awmna hman mai theih tura peihfel tawh pawh thawktu lak belh an nih loh chuan tihpuitlin a harsat dawn thu an sawi a, Specialist daktawr ICU a duty tur critical care ti thei anneih belh loh chuan a manganthlak tan tih sawi niin, a rawihna tur pawh awm se specialist daktawr COVID-19 hri kaite enkawlna tura thiamna bik nei Mizoramah an vang tawh tih tarlan a ni.

WHO hotuten khawvekl hmun 6 a an then zinga hmun 5 ah COVID-19 hri kai an pung leh tawh tih an sawi thu meetingah hian tarlan niin, Mizoramah pawh COVID-19 hri kaiteb zingah naupang lam an pun chak avangin third wave lo thleng tur an sawi atana inpuahchahna pawh a chak thei ang bera kalpuia tul tih sawi a ni a, ZMC a naupang hri kai serious te enkawlna tur NICU/PICU leh HDU a hman tur bungrua chi hrang hrang cheng nuai 50 man hu LG Electronics Company in an pek thu tarlan a ni.

Tun dinhmunah COVID-19 hri kaite zingah symptom nei, oxygen pek ngai an pun chak thu tarlan a ni a, a tira symptom nei lo, a hnua symptom na taka nei an tam thu tarlan a ni bawk. District tina COVID-19 hri kai, oxygen mamawh leh enkawl uluk ngai bikte dahna tura ruahman Dedicated COVID Health Centre (DCHC) te chu sawrkar laipui inkaihhruaina anga a nih dan tur taka hmang tura in hriattir leh nise tih a ni.

State Nodal Officer on COVID-19, Dr. Pachuau Lalmalsawma report danin kumin March thla khan COVID-19 hri kai mi 53 an awm a, April thlaah mi 1655, May thlaah mi 6268, June thlaah mi 8093 leh july ni 11 thlengin mi 3691 an awm a ni. Kumin July ni 1 – 10 inkarah hri kai mi 3501 awmin kum 1 hnuai lam mi 51 (mipa – 28, hmeichhia – 23), kum 1 – 10 inkar mi 501 (mipa – 259, hmeichhia – 242), kum 11 – 20 inkar mi 649 (mipa – 309, hmeichhia – 340), kum 21 – 30 inkar mi 807 (mipa – 403, hmeichhia – 404), kum 31 – 40 inkar mi 607 (mipa – 307, hmeichhia – 300), kum 41 – 50 inkar mi 404 (mipa – 201, hmeichhia – 203), kum 51 – 60 inkar mi 251 (mipa – 126, hmeichhia – 125), kum 61 – 70 inkar mi 151 (mipa – 73, hmeichhia – 78), kum 71 – 80 inkar mi 59 (mipa – 29, hmeichhia – 30), kum 80 chunglam mi 21 (mipa – 13, hmeichhia – 8) an awm a ni.

July 1 – 10 inkara positive hmuhchhuah zingah hian a tira symptom nei mi 1641 awmin, symptom nei lo mi 1860 an awm a, tualchhunga hri inkaichhawng mi 3485 nij heng zinga mi 2117 hi positive contact atanga hri kai an ni a, State pawn atanga rawn lut hri kai hmuhchhuah mi 16 an awm a ni.

Mizorama COVID-19 vaccine pekchhuah tawh dan report ngaihthlak niin July ni 10, 2021 thleng khan Vaccine dose 666483 pekchhuah tawh niin, vaccine full dose la tawh mi 88874 an awm a ni. Electoral Roll thar ber atanga chhutin Mizoramah kum 18 chunglam Vaccine pek theih mi nuai 7.75 an awm a, tunah hian vaccine first dose la tawh zat hi 75% a ni a. July thla chhunga vaccine second dose pek ngai zat chu mi 1,60,720 an ni a, tun dinhmunah vaccine stock a awm that thu report a ni. Raipuarte tan vawiin atangin vaccine pekchhuah tan a nih thu tarlan a ni.

Kum 45 chunglam zinga vaccine la tawh zat hi 79% an ni a, kum 18 – 44 in kar vaccine la tawh zat hi 62 % a ni. Hripui leng laka kan himna tur pawimawh tak a nih vangin mipuite zinga vaccine la lo te chu la thuai thuai turin an ngen a ni.

Aizawl Municipal Corporation (AMC) hotute report danin AMC huamchhunga Community Quarantine Facility 124, CCC & Paid CCC 11, CCCC 44 leh Hotel Quarantine Facility 18 te hnawmhnawk/bawlhhlawh an paih sak a, hemi atan hian mimal bawlhhlawh phur lirthei LMV 4 leh MMV 2 hire belhin a thawktu mi 8 an rawih belh bawk a ni.

Health Minister Dr. R. Lalthangliana chuan COVID-19 hripui dona a ral hmatawnga thawktute chu an hah rimtawng tawh hle a ni tih sawiin, ram leh hnam himna tur anih vangin theihtawp chhuaha tangmar hram hram turin a ngen a ni.