No.2276/2021-2022

Aizawl, 18^th September, 2021 : Vawiin khan SAD Conference Hall, MINECO ah Mizoram a COVID-19 hripui leng mek dinhmun thlirho a ni a. He hun hi Health & Family Welfare Minister Dr. R. Lalthangliana'n kaihruaiin, DM&R Minister Pu Lalchamliana,  MOT Chairman Dr. ZR Thiamsanga, Chief Secretary Pu Lalnunmawia Chuaungo, AMC Councillor-te Health Department hotute, Police hotute, Aizawl DC, ZMC hotute, Aizawl City Local Council Association, MKHC, IMA leh NGO Coordination Committee  aiawhte an tel a ni.

Health Minister Dr. R. Lalthangliana chuan hripui leng dona kawnga thahnemngai taka thawktu pawl hrang hrang, kohhranhote, tlawmngai pawlte, medical team leh VLTF/LLTF, frontline workers te leh sawrkar hnathawk zawng zawngten theihtawp mahni zawn theuha an chhuah avanga lawmthu sawiin, kan dinhmun erawh kan beisei ang a ni thei rih lova, hetih mek laia beidawn leh chauh sawi lova theihtawp chhuah tang tanga kan la tang tlang tlat thei hi a ropui takzet a, kan thawhhona a that avangin mipui nghawng tur thutlukna siam a tul chang pawhin rilru inhawng zau taka kan inrawnkhawm zel theite hian hma lak a ti awlsam a ni, a ti a. Aizawl Municipal Corporation Councillorte leh AMC officials ten langsar si lova tangkai tak tak hna an thawk thinte hi an chhuanawm takzet a, an inpekna a ropui hle a ni, a ti bawk.

Police Contact Tracing Team report ngaihthlak niin tun thla kal lai mek September thla chanve (ni 1 – 15) chhung hian AMC area local Council 85 ah hri kai thar hmuhchhuah an ni a, AMC pawn khua/veng 406 ah hri kai thar ni 15 chhung hian hmuh an ni bawk. Hetih hun chhung hian Mizoram pawn atanga lo lut positive 16 an awm bawk a, positive hmuhchhuah tharte hi mipa 7342 leh hmeichhia 8116 an ni a, hri kai thar zingah hian kum 11 – 20 inkar an tam ber a, mi 3192 niin, kum 21 – 30 in kar mi 2997 in dawtin a pathumnaah kum 10 hnuailam  mi 2850 an ni. AMC area a September thla chanve chhunga hri kai tam zualte chu an tam dan indawtin hetiang hi a ni : Bawngkawn, Bethlehem Vengthlang, Thuampui, Zemabawk, Tuikual South, republic, Bethlehem, Ramthar, ITI, Durtlang Leitan a ni.

August thla chhunga hri kai hmuhchhuah zingah chhan hrang hrang vanga negative certificate lak tum, inrinhlelh ngaihna hre lo mi 135 awmin, damdawi ina inentir tura kal, OPD a screening lo tih sakna a hri kai hmuhchhuah mi 176 an awm a, Healthcare workers 224, LLTF/VLTF member 20, CCC-a thawk volunteer frontline workers 12, Positive enkawltu mi 26, raipuar mi 22 leh VLTF/LLTF ten misual an man sample test sak atanga hri kai tih hriat chhuah mi 6  an awm a ni.

ZMC dinhmun ngaihthlak niin ICU khum 34 leh ward hrang hranga khum awmte a khat deuh reng a, damlote zingah serious an tam hle bawk a, tunhnaiah phei chuan kum upa lam aiin kum la naupang zawkte zingah ICU ventilator support mamawh an tam tawh hle zawk tih a tarlan a ni. ZMC ah thawktu an indaih lo hle a, a bik takin staff nurse indaihlohna nasa zualin, an mamawh ang zat thawk tur mihring an inhmu zo lo tih sawi a ni a, sawrkarin volunteers 123 lak a phalsak te pawh lak fel an ni a, an zinga mi 26 in an chawlhsan leh tawh a, anmahni thlaktu tur hi an la zawng hmu zo lo a ni.

SEDP hmanga siam Oxygen plant 200 lpm chu tunah hian a khawl tihnun reng a ni a, PM Cares atanga hmuh 300 lpm pawh tluang taka hman niin, PM Cares atanga hmuh tho 1000 lpm pawh a khawl dahna tur in sak zawhfel tawh a ni a, hnathawktu CPWD te pawhin khawl bun hna an zo tep tawh a ni.

 District Hospitala daktawr leh nurse te COVID-19 hrikaite enkawl dan tur (critical care) practical training ZMC-a neih tir a pawimawh thu meetingah hian sawi a ni a, Civil Hospital, Aizawla COVID-19 hri kaite enkawlna tur ICU khum 10 chu peihfel thawkhat tawh niin, Pediatrics ICU khum 4 awmna pawh zawh fel tep a ni. ZMC-ah ICU ward siam belh leh a tul thu pawh sawi niin a tul anga hmalak tum a ni bawk.

Vaccine pek chhuah chungchangah tan lak a ngai lehzual tih tarlan niin tunah hian first dose hi 87% in an la tawh a, vaccine lak tlemna district ah te beihpui thlak tum a nih thu sawi niin, harsatna hrang hrang vanga vaccine lakna hmun pan ve thei lote chhuichhuah a, a tul anga mobile team din a an chenna ina kal chilh tura ruahmanna siam tha tih a ni.

Zin veivakte lo buaipui dan leh quarantine dan inkaihhruaina hman lai mek chu ennawn tul nia hriat a ni a, sample test kalpui dan pawh a tul anga thuneituten ennawn tha tih a ni bawk a, hengah te hian rawtna chi hrang hrang a lut hlawm a ni.