No.2275/2021-2022

Aizawl 18.09.2021: Chief Minister Pu Zoramthanga chuan vawiin khan World Bamboo Day puala India hmarchhak state te'n Virtual Conference an buatsaih chu khuallian niin a hmanpui. He virtual conference hi Confederation of Indian Industry (CII) leh Government of Nagaland tangkawp buatsaih niin, "Challenges, Opportunities and The Way Forward in North East" tih chu thupui ah hman a ni.

Chief Minister chuan sawrkar laipuiin bamboo development lama hma a laknaah India hmarchhak state-te an pawimawhna leh tangkai thu a sawi a. Ram ruak awm zat leh ruahtui, sik leh sa dinhmun in a zir avangin nasa taka hmarchhak state-te economy chawisang a, rampum tana thawhhlawk belhchhah turin theihna a awm thu a sawi. Chief Minister chuan mau leh rua te chu chin uar ringawt emaw, mau leh rua a innghat industry din chauh chu a tawk loh thu sawiin, mau chingtute leh a leitute'n hlawkna tam ber an tel theih nan 'transportation cost' tihhniam a pawimawh thu a sawi a. Hemi atan hian bamboo link road siam a pawimawh thu tarlangin, sawrkar laipuia hotute bula a lo thlen tawh thin thu leh, sawrkar laipui pawhin ngaipawimawh tura a duh thu a sawi. Chief Minister chuan state tin economy tana tangkai a nih avangin bamboo development chungchangah tangrual taka thawka, theihtawp chhuah tlang turin a sawm bawk.
  
Vawiin virtual conference ah hian Pu Abhijit Barooah, Chairman CII NE Council & MD Premier Cryogenics Ltd. chuan chhimtute lawmna thu sawiin, Mau leh Rua hi North East State te tan a hmasawnna rahhbi pakhat- Entrepreneur-te, start up-te leh loneitu ten a eizawnna ngelnghet atan an hman chhoh theih nan a rahbi pawimawh tak a nih avangin World Bamboo Day pual a he hun hi buatsaih a nih thu a sawi.

Dr. Alka Bhargava, IFS, PCCF & HOFF, Govt of Assam; Pu Sanjay Kumar Singh, IAS, Secretary Ministry of DONER; Pu LM Jamir, CII Nagaland State Council & MD Symbios Creations Pvt Ltd.; Pu Dina Chhangte, Founder King Industries; Dr. N Barathi, MD Growmore Bio-Tech Ltd.; Dr. Aotoshi Past Chairman, CII Nagaland Council & CEO, Window Media; Pu Kamesh Salam, Founder & ED South Asia Bamboo Foundation leh Pu Bhargav Siddhanta, GM Bamboo Technology Park te telin thu an sawi hlawm bawk.

Attachment

  • Loading attachment...