Vawiin khan SAD Conference Hall, MINECO-ah Mizoram COVID-19 dinhmun thlirhona (review meeting) neih a ni a, COVID-19 vanga inkaihhruaina hman mek chi hrang hrangah inthlahdul hret rel a ni. Meeting hi Health & Family Welfare Minister Dr. R. Lalthangliana'n a kaihruai a, Home Minister Pu Lalchamliana, School Education Minister Pu Lalchhandama Ralte, I&PR Minister Pu Lalruatkima. MOT Chairman Dr. ZR Thiamsanga, MLA, Chief Secretary bakah Sawrkar department hrang hrang hotute an tel a, Mizoram University, Mizoram kohhran Hruaitute Committee, Jt. NGO Coordination Committee leh Indian Medical Association aiawhte an tel bawk.

Vawiin thukhawm chuan Mizorama COVID-19 dinhmun uluk taka an thlir hnu ah February thla atang chuan Pathianni chhun inkhawm leh Inrinni chhun Sabbath inkhawm chu neih tan tawh nise tha an ti a. heng inkhawmah hian Ministry of Home Affairs-in inkaihhruaina a siam zawmin thutna awm zat (seating capacity) chhuta 50% emaw mi 200 aia tam lo ah a tlem zawk zawk tel theih a ni ang. Class X leh Class XII Board exam turte tan January ni 22, 2021 atang class kal chhunzawm tura rel a ni bawk a, Board exam turte tan Hostel-a luh phalsak an ni bawk a, amaherawhchu RAgT test paltlang vek an nih a ngai thung. Hemi chungchanga inkaihhruaina kimchang chu State Executive Committee on Disaster Management in ruahmanna an siam ang.

Vawiina thurel zingah Mizoram pawn atanga lo lutte swab sample test sak dan leh quarantine dan ruahmanna siam that a tel a, Health & Family Welfare department-in a kalpui dan tur ruahmanna an siam dawn a ni. Vawiin meeting-ah hian chhiatni thatni a mihring kal phalsak chin pawh tihpun rel a ni a, zan curfew pawh thlahdul tha tih a ni. Aizawl khawpui chhunga lirthei tlan dan pawh thlak tur a ni a, sumdawnna hmun bakah Hotel, picnic spot, gym leh infiamna hmunhma hman dan chungchanga inkaihhruaina pawh thlahdul hret rel a ni. Inkaihhruaina thar hman tan hun leh kalpui dan tur kimchang hi State Executive Committee on Disaster Management in a duang dawn a ni.

Thla khat kalta (15.12.2020 - 14.1.2021) chhung khan Mizoramah COVID-19 positive 267 hmuhchhuah an nih thu leh an zinga 137 (51.31%) chu Mizoram pawn atanga lo lut an nih thu tarlan a ni a. Heng zinga 25 chu mizo an ni a, 112 hi Mizo ni lo civil mi an ni a, 45 hi Paramilitary Forces an ni.