No.7172/2020-2021 

Vawiin khan Lunglei District Task Force on Immunization chu an Chairman Lunglei DC Pu V.Lalsangliana kaihhruaiin Covid-19 Vaccine leh IPPI 2021 chungchang sawihovin an thukhawm. He hunah hian Lunglei DTFI member-te bakah Lunglei District Covid-19 vaccine pek chhuah vil tura WHO atanga lo kal Observer mi pathum – Dr Lalit Dinkar Sarode, Dr Lalvenhimi Khiangte leh Lalruatfeli Ralte te an tel a ni.

DTFI Chairman Lunglei DC Pu V.Lalsangliana chuan Covid-19 hri danna vaccine Covishield Lunglei District alo thleng chu lawmawm a tih thu a sawi a. He vaccine pek chhuah hna hi Lunglei District chhungah tluang taka kalpui a nih theihna turin thawktute duhsakna hlanin an mamawh leh harsatna te inthlahrung lova a tul anga District administration hnena thlen thuai thin turin a chah a. Covid-19 hri danna vaccine chungchangah social media leh hmun dangah thu dik tluantling lo thehdarh lo tur leh medical lam mithiamte thusawi leh thurawn te ngaichang thin turin Lunglei DC chuan Lunglei District mipuite a chah a ni.

Dr Lalrinthangi, District Immunization Officer & Member Secretary, DTFI Lunglei District chuan report pe in  COVID-19 hri danna (vaccine) pekchhuah dan tur sawrkar laipuiin a ruahman chu Lunglei District tana tha taka kalpui turin engkim inpuahchah fel anih tawh thu a sawi a. Kar hmasa zirtawpni (8^th January, 2021) khan vaccination pek chhuah tih chhinna Mock Drill/Dry Run hlawhtling taka neih alo ni tawh a. He Vaccine hi a hlauhawm lova, mithiam zawkte'n mihring hman atan a hlauhawm lo a ni tih an zirchian hnuah hman theih tura chhawpchhuah a nih thu a sawi.

Covid-19 vaccine hi a hmasa berah Healthcare  worker-te hnenah pek an ni dawn a, chumi zawhah Frontline workers, Police, BSF, AR etc. te pek leh an ni ang.  Hemi dawtah hian kum 50 chin chung lamte bakah kum 50 hnuailam natna benvawn vei hote ngaih pawimawh an ni leh dawn a ni. Vaccine hi Naupai, Nu hnute pe lai te tan dawn loh tur a ni a. Kum 18 hnuailam te pawh an taksa ah natna hrik do theihna (immunity) an neih that avangin pek chhuah an ni rih dawnlo a ni. 

Covid-19 vaccine dawng thei tur hian Lunglei District pumah Health Care worker mi 2050 ziahluh an ni tawh a. Frontline worker data pawh hi Lunglei DC Office-in veng leh khaw hrang hrang VLTF-te atangin an la khawm mek a ni.

Lunglei Civil Hospital-a Covid-19 vaccine pek chhuahna hmun session site hi Civil Hospital Building Top Floor-ah neih tur niin ruahmanna felfai tak siam a ni tawh a. Vaccine pe chhuak tu te bakah Vaccination Officer pali (4) an duty reng dawn a. Social Distancing maintain chunga intlarna tur ruahman niin Waiting Room, Vaccination room bakah vaccine dawn zawha minute 30 an hahchawlhna hmun tur Observation Room a awm dawn bawk a. Vaccine lak zawha engemaw harsatna nei anlo awm palh anih chuan AEFI (Adverse Event Following Immunization) kit dah lawk sa niin doctor leh nurse ten hemi hmang hian an enkawl nghal dawn a ni. Vaccine hi mi pakhat tan dose 2 lak tur niin dose khatna lak hnu ni 28 ah dose hnihna lak leh tur a ni a. Covid vaccine hi company hrang hrang siam mi pakhat in a lak pawlh tur ani lo a, naktuka Covishield vaccine la tur te pawh hian a dose hnihna ah Covishield vek hi an la leh ngei tur a ni. 

Vaccination pek chhuah hna hi sawrkar laipui ruahmanna angin CoWIN (Covid Vaccine Intelligence Network) Application hmanga kalpui tur niin he application ah hian Report thehluh nghal zel a ni dawn a. He CoWIN application buaipui tu tur bik Officer ruat an ni bawk. 

Meeting-ah hian zeng hri danna beihpui IPPI - Intensified Pulse Polio Immunization chungchang pawh sawiho niin naupang kum 5 hnuailam hnenah pek leh tur a ni a. Lunglei District tana target population hi mi 15,616 niin February 2^nd 2021 ah neih tan tum a ni.