Mizoram Road Safety Council-in kum 2021 January ni 18 leh February ni 17 inkar chhunga Road Safety Month, 2021 hman tura a rel bawhzuiin vawiin chawhnu khan Lawngtlai District Road Safety Committee chu Additional Deputy Commissioner Pi Marilyn Rualzakhumthangi hovin a office chamber-ah an thu khawm a. Lawngtlai District chhunga Road Safety Month hman dan tur an sawi ho.

Chairman Pi Marilyn Rualzakhumthangi chuan lirthei vanga chetsualna titlem tura hma lak chu eng tik lai pawhin a tul reng tih sawiin, lirthei vanga chetsualna thleng thin a ziaawm theih nana Road Safety Month hman chhunga hma lak dan turte ngun taka ngaihtuah turin member kal khawmte chu a sawm a. Road Safety Month hman dan tura Mizoram Road Safety Council-in ruahmanna a zam sa, Approved Action Plan chu a sawi fiah nghal bawk.

Road Safety Month, 2021 hi Lawngtlaiah chuan Bazar Venga Areopagy hmunah January ni 18, 2021 zing dar 7-ah a hawnna hun hman ni se, tih a ni a. Road Safety Month hman chhung hian mipuite tanpui nan leh an hriat duh zawngte hrilhfiahna tur Help & Guidance Desk buatsaih tum a ni a. Local Cable TV-a pek chhuah turin thil pawimawh sawi hona (talk show) buatsaih ni se, tih a ni bawk a. Hei bakah hian sumdawng lirthei khalhtu tha (best driver) leh traffic police thawk tha thlan an ni dawn a. State lam atanga ruahmanna awm sa angin, road safety leaflet leh pamphlet sem chhuah te, lirthei chetsualna laka fimkhur tura intiamna (road safety pledge) buatsaih leh Lawngtlai khawpui chhung kawtthler pawimawh laiah mipui zirtirna thuziak (road safety banner) tar te pawh rel a ni.