No.7170/2020-2021

Vawiin chawhnu khan Mizoram chhunga a pathumna ni turin Vengthar, Kolasibah MYC Coaching Centre hawn a ni a, Pu K.Lalrinliana, Minister of State, Food, Civil Supplies & Consumer Affairs Department, bialtu MLA ni bawk chu Khuallian niin MYC Chairman Dr. Vanlaltanpuia, MLA chu khual zahawm a ni bawk.

Minister Pu K.Lalrinliana chuan MYC Coaching Center hawnna a thu a sawinaah,  hmasawnna thleng tur a thil pawimawh hmasa tak pakhat chu rilru put hmang siam that hi a ni tiin chumi atan chuan he coaching center hi tangkai tak a hman a nih ngei a beisei thu a sawi a, MYC Coaching Centre, Kolasib hawn theih a sak puitlin a nih theih nana Mizoram Youth Commission hmalaknate, Kolasib sawrkar department hrang hrang inpekna leh khawtlang hruaitute thahnemngaihnaah lawmthu a sawi nghal bawk a ni. Minister chuan zirna a intlansiaknaah Kolasib district chuan hmathar kai tur tam tak an la hmabak thu sawiin chumi atan chuan MYC Coaching Centre mamawhna sang tak a awm lai mek a hetiang a hawn theih a a awm ta chu lawmawm a tih thu a sawi a. Lehkha zirna mai piah lam ah eizawnna tlak thiam thil neih a pawimawh thu sawiin eizawnna tlak thiam thil nei kut hnathawktute leh a mamawhtute awlsam zawk a an inchhawr zung  zung theihna turin inhrilhhriatna felfai leh mumal tak kalpui tum a nih thu a tarlang a, hemi atan hian Kolasib district chhung a Village  Council hruaitute nen tang hovin hmalak mek a nih thu Pu K.Lalrinliana chuan a sawi.

Dr.Vanlaltanpuia, Chairman, Mizoram Youth Commission chuan MYC tobul leh thalaite tan a eizawnna rintlak kawhhmuh kawng a an hmalak dan hrang hrangte sawiin UPSC, MPSC leh MSSB paltlang tur a zirtirna nasa zawk a kalpui chu MYC hmalakna hnuai a thuang lian tak a nih thu a sawi. UPSC kaltlang a central service inelna paltlang thei turin thalaite cho phur nan IAS Full sponsorship buatsaih a nih thu leh hemi atan hian mi 20 thlan chhuah an nih tawh thu a sawi a, Chanakya IAS Academy leh ALS Coaching Centre, Delhi-ah te coaching kal tir an nih tur thute, a senso zawng zawng chu tum sak vek an nih tur thu MYC Chairman chuan a sawi bawk a ni. Mizo thalaite zingah khawvel hmun dang nen khaikhin pawh a thiamna zahpuiawm loh tak tak nei thahnem tak an awm thu sawiin heng an thiam thilte hi eizawnna tlak a siam tum a rilru sen peih a tul thu a sawi a. Dinhmun sang ringawt tinzawn tum lovin kan ram leh hnam mamawh ang zel a eizawnna dap thiam hi ram hmasawn nan a pawimawh thu Dr.Vanlaltanpuia chuan a sawi bawk a ni. MYC Chairman chuan hrileng vanga Mizoram mi leh sa ram pawn a eizawng lo hawte tan an eizawnna dapna kawng a harsatna an tawh loh nan district hrang hrangah Skill Training kalpui mek a nih thu sawiin lehkha zirna piah lam ah eizawnna tlak thiam thil thalaite hnen a zirtir chu MYC tum lian tak a nih thu a sawi bawk a ni.

MYC Coaching Center, Kolasib hawnna hun hi Pu Donny Lalruatsanga, Secretary, MYC-in a kaihruai a, Dr.H.Lalthlangliana, DC Kolasibin kalkhawmte lawmna thu sawiin Pu Lallawmawma, Addl. DC in report tawi a pe. Hrilengin ziaawm lam a pan a, inkhuahkhirhna te thlah dul a nih velah MYC Coaching Centre, Kolasib hi ALS coaching centre faculty ten offline in zirtirna an kalpui tan dawn a ni.