CZ Foundation ‘Lawm Rawih Zan’ chu Pu Lal Thanzara Health Minister in nizan khan Lal Thanhawla Auditorium ah a hmanpui. HIV/ AIDS vei mekte mi harsa zawkte tanpui a tuamhlawm nana Lukhum leh thil dang dang te phiar chhuaka mi thahnemngaite rawngbawlna chikhat Knitting Charity a hawng nghal bawk.
Pi Lalchhuanzuali kaihhruaina leh hmalakna a din CZ Foundation ten HIV /AIDS darh zau zel tur venna kawngah leh a kai mek ten harsatna an tawh loh na tura thahnemngai tak a hna an lo thawh dan leh People’s Living with Hiv te nena an hmalak na chu a hlu in a lawmawm hle a ni tiin khuallian Pu Lal Thanzara chuan HIV hian kan ram hi min luhchilh nasat tawh avangin a hlauhawm dan leh a pawizia hi mitin in kan hriat a puanzar- Awareness a tul in, a remchang lai khawihmunah pawh hemi kawngah hian beihpui thlak a ngai takzet tawh a ni a ti a. Tunah hian Synod Moderator leh puipa te nen pawh AIDs dona kawngah inhmukhawm tawhin hmalak dan tur leh hmachhawp an neih dan te leh kumin December thla atanga tan in Synod hruaitute nen remruatna hrang hrang an duanlawk te chu a sawi bawk.
He natna chimawm leh tihbaiawm tak hi ven leh tihremna kawngah a buaithlak a, a inkaidarh dan lah hi puanhnuai thil leh mi hmuhloh tur lai zawnga a ruk a rala khawih leh tih thin a nih avangin pawngpaw do ngawt a harsat thu khuallian chuan sawiin a vei leh kai zingah mi pangngai anga ngaih KTP member thenkhat te ngei pawh an tel tih hmuhchhuah a ni a, chuvang chuan a darh zel tur veng tur in Sorkar, Kohhran, NGO leh mimal tanrual ho a ngai a, a pawizia la hre lo te hnenah sawi zau zel a ngai a ni a ti.
CZ Foundation in HIV/AIDS vei mek naupang leh hmeichhiate bakah mi harsa zawkte tanpui leh dawmkan nana an thawhna chu hmasawn a thang zel tur leh zau zawka ke pen zel tura duhsakna hlan in Pu Lal Thanzara chuan an mamawh leh tul atana an hman atan Rs 50,000/- (Cheng Singnga) ‘ Lawm Rawih Zan’ hian CZ Foundation hnenah a pe a ni.
Hemi zan hian Pi R Zomuanpuii Vice President ,YWCA of Aizawl leh Tv Lalawmpuia General Secretary, CZ Foundation te’n report leh an kalphung leh hnathawh dan te an sawi fiah a. HIV/AIDS chungchang ‘Ka Nu Lehkha” short movie preview hun Dr Tawnenga Principal, Pachhunga University College in a hman hnu in Dr. Lalmalsawmi Sailo, Project Director, MSACS in Movie a release a. Pu Chandra Kanto Molsom, Project Manager, CARE -World Vision in ‘AIDs I titawp teh ang’ tih thupui hmangin thu a sawi bawk . USA atanga lo kal Dr Icilda Humes Co-Founder of Global Cottages leh Dr Anita Davis, Author, Though leader and Co-Founder of Global Cottages te chuan he programme hi an hmanpui bawk a ni.
