Union Minister of State for Human Resource Development, Dr Mahendra Nath Pandey chuan vawiin khan Mizoram University a hmeichhe hostel thar, nuai 578.36 chuanga sak zawh “Senhri Hall of Residence” chu a hawng. Union Minister hi Higher and Technical Education Commissioner & Secretary, Pu Benjamina, IDAS leh official dangten an tawiawm a ni.

Union Minister hi MZU Vice-Chancellor nen inkawmna hun neiin, University in harsatna hrang hrang an neih te sawipui a ni a. MZU a zirtirtute leh Association hrang hrang hotute nen inkawmna hun a nei bawk.

Vawiina hawn tak Senhri Hall of Residence hi University Grant Commission (UGC) atanga sum hmuh hmanga sak niin, mi 100 lenna a ni a. Mi pathum mut theihna room 9, mi pahnih mutna room 32 leh mi pakhat mutna room 15 a awm a. Kum 2014 November thla khan a sak hna hi tan niin, kumin July ni 31 khan zawh fel a ni a. Mizoram University-a Halls of Residence (hostel) pakuana niin, a vaiin hmeichhe hostel pali leh mipa hostel panga a awm a ni.