No.410/2021-2022

Aizawl, 5th May, 2021 : Vawiin khan Health Minister Dr. R. Lalthangliana kaihhruaiin SAD Conference Hall-ah COVID-19 positive te enkawl dan leh thil pawimawh chi hrang hrang sawiho a ni a. He sawihona ah hian specialist daktawr chi hrang hrang, Sawrkar daktawr pension te leh thawklai mekte bakah private daktawr leh private hospital enkawltute an tel a ni. Minister hi Chief Secretary Pu Lalnunmawia Chuango, Health Special Secretary Pu R. Lalramnghaka leh official pawimawh ten an tawiawm a ni.

Meeting kaihruaitu Health Minister Dr. R. Lalthangliana chuan Mizoramah a ni telin COVID-19 positive kan pung telh telh a, chu mai ni lovin symptom nei a hma aiin an tam telh telh bawk hian hripui veite enkawl kawngah a bikin harsatna a siam tan tih a sawi a, damlo enkawl dan turah ngaihtuahna uluk taka sen a tul a, kum hmasa aiin nasa takin kan tan tlan a ngai a ni, a ti a. Sawrkar daktawr leh nurse bakah medical workers te dinhmun en hian kan indaihlohna a nasa lehzual ta a, a thlaphanthlak deuh tak avangin theihtawp chhuaha kan tan tlan a ngai a ni, a ti a. Private hospital leh daktawrte bakah daktawr pension tawh ten thahnemngai taka theihtawp chhuahpui an inhuam avang erawh chuan kan hlauthawng lo a ni tiin, an inhuamna ah lawmthu a sawi a ni.

Vawiin meetingah hian COVID-19 hrik thahna damdawi bik hmuhchhuah a la nih loh avangin mipuite tan damdawi lo ei ve leh lo inenkawl danah fimkhur a tulna laite inzirtir a tul thu sawilan niin, a tul anga rang taka hmalak tha tih a ni a. Tunhnaia COVID-19 positive hmuhchhuah thar zinga kum 60 chunglam an tlem tak thu leh thalaite leh naupang zingah COVID-19 positive an pung chak sawt ta hle tih sawi a ni a, naupang kum 10 hnuai lam positive an pung chuan chhungkuaah a hma aiin kan inkaidarh nasa hle tih a tilang nia an hriat thu sawi a ni bawk. daktawrte chuan tuna positive kan pun dan en hi chuan engemawchen chu a lo berah nitin CCC/CCCC-a damlo 400 vel dah luh belh reng tura in hisap a ngai nia an hriat thu an sawi.

Home Isolation hi tunhma aia nasa zawka kalpui a tul thu pawh sawi niin, Home isolation a inenkawl dan tur leh enkawl tur chin erawh felfai taka ruahmanna siam tha an ti a. Symptom nei lo, symptom nei na vak lo leh serious deuhte enkawl dan tur pawh khairual taka kalpui an nih theihnan in kaihhruaina dan siam a that thu tarlan niin, an nat dan azira damdawi pek dan turte sawiho a ni. COVID-19 positive Home Isolation a awmte leh CCC/CCCC-a awmte uluk taka vil a pawimawh thu tarlan niin, daktawr ten a hmuna an kalchilh a rem lo a nih pawha mobile phone leh internet kaltlanga video call/phone call leh message hmanga regular taka in vil a pawimawh thu sawi a ni. hei bakah hian Quarantine Centre leh CCC/CCCC te chu boruak luh that theihna tura ruahman zel a pawimawh thute, COVID-19 positive te tan hah lutuk si lova nitin taksa sawizawi a pawimawh thute, in lama inenkawlte tan pawh oxygen level uluk taka inchik reng a tul thu leh oxygen level a hniam deuh a nih chuan anmahni insawisel lo mahse daktawrte rawn vat a pawimawh thu sawi a ni. Home Isolation, CCC/CCCC leh Quarantine chungchanga inkaihhruaina leh zawm tur Standard Operating Procedure (SOP) kum kalta lama siam chu ennawna her rem a tul tawh thu sawi a ni a. Ambulance hman dan tur leh ruahman dan tur SOP pawh siam a that thu sawi a ni.

Daktawr thiam kalkhawmte hian COVID-19 hrik hn athawh dan an sawi a, a tlanglawn berah chuan chuap a khawih nasa in chuap a tivunga, chuap a chhiat chuan pneumonia an vei a awldsam em avangin a hlauhawm hle a ni, an ti a. Hei bakah hian COVID-19 hian lung a khawih nasa a, thisen a tih khal theih avangin thisen zam pahnih artery leh vein te a block duh avangin heart attack leh stroke a thlen thei a ni an ti a, lungphu a tihran avanginlungphu thalo a thlen thei a ni tih an lo tawnhriat tawh thu an sawi bawk. Heng bakah hian mihring taksa a harsatna hrang hrang COVID-19 in a thlen theihte an sawi bawk a ni.

COVID-19 hri kaite tan oxygen tlakchham a hlauhawm thu sawi niin, oxygen tlakchham hian nasa takin taksa a nghawng a, lung, kal leh thluak a tichhe thei a, hei hi ven reng a tul an ti a, eng damdawi mah hi a tha ber e tih sawi tur a awm rih loh avangin damlote mamawh ang tawk oxygen lakkhawl reng a tul thu sawi a ni.

Hri kan inkaidarh nasat chhan ber nia lang chu mask vuah that loh leh social distancing kan vawn that loh vang nia a lan thu daktawrte hian an sawi a, thalaite zinga oxygen level (SPO2) hniam thut an tam a, an taksa a hrisel that avangin rei tak harsatna awm lovin an awm thei a, mahse a rawn lan chhuah meuh chuan a lo pawi viau hman thin a ni, an ti a. A theih hram chuan mahni inchik reng a, pulse oxymeter hmang emaw a in monitor reng a tha a an hriat thu an sawi.

Zoram Medical College ah ICU khum 7 leh SICU khum 6 a awm thu leh ICU anga hman theih tura ruahman khum 15 awm theihna a awm thu tarlan niin, reilote ah COVID-19 hrikai enkawlna ward khum 65 awm theihna an peihfel tur thu tarlan a ni bawk

COVID-19 Helpline/Control Room district headquarters tinah ruahman a pawimawh thu meetingah hian sawi a ni bawk.