No.409/2021-2022

Kolasib dated 5th May 2021: Vawiin chawhnu khan DC Conference Hall, Kolasibah Bawrhsap Dr.H.Lalthlangliana hovin Covid-19 hrileng dona chak leh rualkhai zawk a kalpui a nih theih nana Kolasib district bial hrang hranga then enkawltu Zonal Executive Magistrate-ten thutkhawmna an nei a, hrikai hnuchhuina leh khunghrante dinhmun sawiho niin VLTF-te nen a pheikhai rual tak a thawh chhunzawm dan tur ruahmannate siam a ni.

Hnuchhui hna mumal tak a kalpui a nih theih nan Contact list rang tak a buatsaih dan tur sawiho a ni a, VLTF-ten contact list an buatsaih chu Contact tracing team-te hnenah rang tak a pek a nih hnuah uluk tak a thliarfel a bawhzui turin hmalak tur a ni dawn a ni. Mahni inringhleh a test duhte chuan Sample Collection Centre-ah an in test tir thei ang a, Centre pan nana lirthei an hman tur erawh a him tawk tih VLTF-ten an hriatpui tur a ni a, ‘Covid-19 Test tur’ tih an tar ngei tur a ni ang. Zonal Magistrate leh VLTF-te hriatpuina a mahni ina inkhunghrang tur a tih chauh lo te chu Quarantine Facility-a dah tur an ni a, hetiang ang dan bawhchhia an awm a nih chuan dan ang a hrem tur a nih thu sawi a ni a, Home quarantine lai te pawhin inkhunghran hun a tawp hma a pawn an chhuak a nih chuan hrem tur an ni bawk a ni.

Hnuchhui tur an thahnem changin khunghran lailawkte endik (test) hun tur a ruat ah endik an nih hman loh chang awm theih a ni a. Endik an nih hnu ah leh an Negative tih finfiah a nih hma loh chuan Quarantine Centre/Home quarantine ah an awm chhunzawm rih tur a ni.

Sawrkar inkhunghranna Quarantine Centre zulzui a Community Quarantine Centre siam chu thutkhawmnaah hian sawi a ni a, Sawrkar Quarantine Centre-in a dawl zawh chhung chu Community Quarantine Centre chu mipui himna tur leh Sample endikna kawnga him tur zawkah ngaiin siam rih lo ni se tih rel a ni a. Kawnpui, Bairabi leh Vairengteah te chuan a tul dan a zirin Zonal Executive Magistrate leh VLTF-te inrawn chung a siam ni se tih rel a ni bawk.

Kolasib khaw chhungah nimin khan Contact tracing tur a sample lak mi 121 an awm a, vawiinah Truenat sample 40 vel lak niin naktuk hian mi 70 chuang RTPCR tur a sample lak tur an awm bawk a ni.