No.408/2021-2022

Lunglei the 5th May, 2021 - Vawiin tlai khan Lunglei DC Pu Kulothungan A chuan Lunglei Civil Hospital tlawhin hospital dinhmun tlangpui leh hmanraw neihte a enfiah a; Covid-19 dona kawnga hmalaknate leh mamawhte a enfiah pui bawk a ni. Lunglei DC hi Medical Superintendent Dr SR Ngurchamliana leh H&FW Department hnathawkten anlo dawngsawng a ni.

Lunglei DC chuan Corporate Social Responsibility (CSR) kaltlanga hospital mamawhte company leh bank-te kaltlanga buaipui sak a duh thu Hospital hotute a hriattir a. Tun dinhmuna an mamawh hmasak Blood Donation Van leh Liquid Waste Manangement Plant din na tur plan leh estimate te a hnenah thehlut tura tiin hei hi a tul anga CSR kaltlanga ruahman anih theihnan bawhzui a tum thu a sawi a. Hmasawnna nei turin hriselna a pawimawh hmasa ber a ni tiin Lunglei DC Pu Kulothungan A chuan H&FW hotute chu an mamawh leh harsatnate a hnena thlen vat thin turin a hriattir a ni.

Lunglei Medical Superintendent Dr SR Ngurchamliana chuan Lunglei District Oxygen dinhmun a that thu leh Civil Hospital-a Oxygen Khawlpui (Oxygen Generating Plant – PCI Deployable Oxygen Concentration System), boruak atanga Oxygen siam chhuak thei, a chak zawng 200 litre/minute chu hman mek a nih thu a report a. He Oxygen Khawlpui atang hian pipe hmangin hospital ward-ah te Oxygen hi pek chhuah theih niin tun dinhmunah khum 70-ah a pe chhuak thei a. Cylinder-a oxygen awmsa sem darh tu khawl pawh engemawzat Lunglei Civil Hospital-in a neih thu a tarlang. Hemi bakah hian Oxygen Refilling and Distribution Centre pawh Lunglei District tan siam tum a nih thu Lunglei DC hnenah hian a report a ni. Lunglei Civil Hospital-ah hian Ventilator Maquet Servo Air pariat leh hei aia ventilator te zawk pali awm mekin heng zingah hian siam that/servicing ngai mek an awm thu report niin hei hi bawhzui vat turin Lunglei DC chuan Hospital hotute chu a hriattir a ni.

Lunglei DC ho hian Blood Bank, Truenat Laboratory, Dialysis Unit, CT Scan, Digital Xray leh Isolation Ward te en ho niin an mamawh district administration atanga bawhzui pui theihte chu lehkha a thlen turin DC chuan a hrilh a. Truenat Laboratory kalpuina atana hmanrua mamawhte pawh dinhmun a that thu Medical Superintendent Dr SR Ngurchamliana chuan a report a ni.

Vawiin khan Lunglei District tan Rapid Antigen Test Kit 3000, PPE 100, Goggles 100, Glove 400, Sanitizer 160, Bleaching powder bag 2 te alo thleng a ni.

Lunglei Medical Superintendent Dr SR Ngurchamliana chuan nimin (4th May 2021) khan thuchhuah siamin Lunglei Civil Hospitala admit thar zawng zawngte Covid-19 (RAgT) test vek turin a hriattir a. Hemi bakah hian damlo awmpuitute (attendant) te pawh an in test tur a ni a, vawi tam tak dialysis tih nawn ngai te chuan kar hnih danah test hi an ti tur a ni a, OPD leh casualty-a inentir tura lo kal, Covid-19 natna anga insawiselna nei te pawh an in test tur a ni. He thupek bawhzui hian vawiin khan damlo attendant mi 55 RagT test neih niin an result a negative vek thu Dr SR Ngurchamliana chuan a sawi.