No.3728/2021-2022

Aizawl, 19th January, 2022 : Health Minister Dr. R. Lalthangliana hovin District tina Chief Medical Officer (CMO) ten COVID-19 dinhmun sawihovin virtual meeting an nei a, Minister hi Health Secretary Pu R. Lalramnghaka leh Dr Lalbiakkima, President, Mizoram State Medical Council & Executive Member, IMA ten an tawiawm a ni.

Health Minister chuan virtual meetingah hian Mizoram ta tur Mobile RT-PCR Van (I-Lab) in Mizoram a rawn thlen tawh thu a sawi a, Company Engineer ten an endik fel tawh thu sawi langin, rokhawlhna a awm loh chuan naktuk chhunah Union Minister for Science & Technology Dr Jitendra Singh-a’n internet kaltlanga a vai liam tur thu a sawi a ni.

Dr Thangte-a chuan virtual meeting koh a nih chhan te sawiin, COVID-19 dona kawngah a ki thlak a strategy thlak te a tul em, tul ta se eng hawi zawngin nge strategy thar te kan duan ang tih te ngaihtuah tul tihna avangin meeting koh a ni, a ti a. Tun dinhmunah hripui a darh nasat avangin health care workers te indaih lohna a nasa em em a, hemi phuhru tur hian midang phungbawma han sawm te a tha em tih te pawh ngaihtuahna neih a nih thu a tarlang a.

Minister chuan Mizoram COVID-19 dinhmun tlangpui tarlangin tunlai hian thingtlang lamah COVID-19 hripui a darh nasa mek tih a sawi a, District tina Chief Medical Officer te pawh hripui dona kawnga theihtawp an chhuahnaah lawmthu hrilhin hun engmaw chen chu kan insanmar a la ngai leh dawn a, ruahmanna felfai tak nen awmze nei tura hma kan lak a tul a ni, a ti. Thingtlang mipuite hnenah uar lehzuala COVID Appropriate Behaviour leh sawrkar SOP te bakah hri kaite enkawl dan tur hriatthiam awl zawka zirtirna kalpui a tul thu a sawi bawk.

Dr Lalbiakkima pawhin thingtlang lama hripui a darh takah hian Aizawl khawpuia IMA member ten hri kaite an vil angin an vil pha dawn lova, heti chung hian a theih ang anga inpuih dan ngaihtuah a nih thu a sawi a, damlote inenkawl dan tur bik fiah felfai taka ruahman a, a tul anga social media leh internet kaltlanga inhrilh a pawimawh dawn tih sawiin, hri kai damlote chu mahni duh thu a damdawi lo inchawh ngawt lo tura hrilh a pawimawh thu sawiin, antibiotics phei chu daktawrte rawn lo chuan ei miah kloh tur a nih thu a sawi bawk.

District tin atangin COVID-19 dinhmunte leh a hmachhawnna kawnga hmalak a nih dante, harsatna leh mamawh an neihte report ngaihthlak a ni a, mipuite hnena uar lehzuala hripui chungchang leh a inven dante, damlo enkawl dante inzirtir a tul thu sawi a ni a, thingtlang lamah a bik takin kum upate leh natna benvawn neite zawn chhuah chak a, a tul anga vil zui a pawimawh thute sawi niin, a bik takin damdawi in leh hmanraw awm that lohna hmuna hri kaite dinhmun uluk taka chik a, ngaihtuahawm deuha an awm dawn chuan a rang lama hmunpuia inthawn a pawimawh thute sawi a ni a, heng dinhmun ngaihtuahawma awmte hriat awlsam theih dan turte pawh sawi niin mipuite hnen ah pawh zirtirna pek a tul tih sawi a ni.

Hmai tuamna (mask) vuah that hi invenna atana pawimawh ber a nih zia mipuite zirtir tam a, mask vuah uluk tura inzirtir a pawimawh bakah fimkhur taka awm chhunzawm zel a la pawimawh thute sawi a ni a, vaccine la la lote pawh lak tir ngei tura tan lak a tul thu sawi a ni bawk.

Attachment

  • Loading attachment...