No.3729/2021-2022

Aizawl the 19th January, 2022: Vawiin khan Champhai District Fire Prevention Committee chu Chairman Pi Maria C.T. Zuali, District Bawrhsap hovin I&PR Conference Hall, CHANEM-ah an thukhawm a, February ni 7-12, 2022 chhunga Champhai District-a ‘Kangmei Ven Hapta’ hman dan tur leh kumin thal chhova Champhai District chhunga kangmei a chhuah lohna tura hmalak dan tur hrang hrangte an rel.

Bawrhsap Pi Maria C.T. Zuali chuan nikum lamah Champhai District chhungah kangmei chhuak a tam thu tarlangin, kumin chhunga kangmei ven hapta hman leh tur chuan kangmei chuak thin tih tlem kawngah hmasawnna a thlen ngei a beisei thu a sawi a. Kangmei chhuah chhan hrang hrangte zirchianga, kangmei ti chhuaktu hrang hrangte thlengpha inzirtirna awmze nei tak nei thei tura tanlak a ngai takzet a ni, a ti a. Kangmei chhuakin thing leh mau, nungcha mai nilo sik leh sa thlenga a nghawng tel zel avangin titawp turin awmze neia mipui thlengpha leh zawm theuh tur zirtirna kalpui a tul thu a sawi bawk a. Nunna hnar pawimawh tak thing leh tui humhalh kawngah penchhuah a pawimawh thu sawiin, thangtharte zirtir an tul thu a sawi a. Champhai District mipuite chu kangmei ti chhuak lo tur leh kangmei ven leh thelh kawngah neitu nihna thinlung pu chunga thahnemngai taka thawk thin turin a chah a ni.

Pu Lalduhthlana, DFO, Champhai Forest Division & Member Secretary, Champhai District Level Fire Prevention Committee chuan kum hmasa lama kangmei ven hapta chhunga hmalaknate a tarlan bakah kumin atana hmachhawp awmte a sawifiah a. Champhai District chu kang tuar nasa leh kangmei chhuak avanga ram kang nasa ber District a nih thu a sawi a. Meeting neihah tawpsan mai lova hmabakte a taka hlenchhuah a nih theihna tur kawnga tawiawm leh finchhuah pui turin District Fire Prevention Committee member leh District mipuite a sawm nghal bawk a ni.

Champhai District Fire Prevention Committee thukhawm chuan Kangmei Ven Hapta hawnna chu February ni 7, 2022 (Thawhtanni) hian DFO Office Complex, Bethel Vengah sawm bik mi tlemte nen neih nise tiin a rel a, a hmunhma leh hun hman dan tur kimchang chu Nodal Department Environment, Forest & Climate Change kutah a dah a. Kangmei laka fimkhur tura inzirtirna, kangmei ven tangkaina leh kangmei thelh kawnga hriat tur pawimawhte leh tulte a zau thei ang bera mipuite thlengpha ngei tura puanchhuah dan turte sawiho a ni a. Media hrang hrang, poster leh vantlang aurinna hmanga inzirtirnate puanchhuah tha tih a ni a. Ran vulh mi, sapel thinte leh silai kawlte hnenah kangmei ven leh nungcha humhalh kawnga inzirtirna neih tha tih niin, kangmei ven hapta hawnni ah silai neite tan Awareness Campaign lam hawi programme buatsaih tha tih a ni a. High School zirlaite tan kangmei ven hapta kaihhnawih Essay inziahsiak buatsaih nise tih a ni a, kangmei ven kawnga thawk tha khua/veng pathum bakah chawimawi phu khua/veng 3 dangte hnenah lawmman pek nise tih a ni a, kangmei ven kawnga inzirtirna chungchanga nitin chhuak chanchinbu thawhhlawkte tan lawmman siam tha tih a ni bawk.

Nodal Department Environment Forest and Climate Change-in mipuite hnenah hriattur pawimawh leh tangkaite duang chhuakin a zau thei ang bera kangmei hluar hun laiin mipuite zirtirna lam hawia thuchhuah siam leh zirlai naupangte hnena kangmei ven kawnga zirtirna pek nise tih a ni a. Huan, Leipui leh Lo hal tur te’n sawrkarin dan a siam zulzuiin mei kawng sial theuh se, kawngpui vat chhuak lo tur leh Lo hal hun March ni 15, 2022 aia tlai lova hal hman vek tura hriattir nise tih a ni bawk.

Champhai District-ah November 2020 atanga May 2021 chhunga ram kang tum 366 thleng avangin ram hectare 3396.61 a zau a kangral a, heng zinga tum 363 chu Lo/Leipui/Huan kang vang niin, Forest Area kang tum 3 a thleng bawk a ni. Kum 2021 khan ram tikangtu ni a puh mi 4 te lakah Champhai PS ah FIR thehluh a ni a, heng bakah hian ram tikangtu mi 2 te chu Rs. 500/- ve ve chawitir an ni. Hun bituk chhunga lo hal hman lo khaw pakhat awmin State Level Sub-Committee on Fire Prevention ah phalna an lak hnuah an hal thei chauh a ni.

India State of Forest Report (ISFR) 2021 tarlan danin Mizoram pum zau zawng atanga chhuta za zela 0.74 chu ngaw dur chhah tha (very dense forest) a ni a, ngaw dur chhah tha lutuk lo (moderately dense forest) za zela 26.11 a awm a, ram hring chin kan tih forest cover zau zawng chu za zela 84.53 a ni. Undivided Champhai District-ah ngaw dur chhah tha Sq. Km 55.36, ngaw dur chhah tha lutuk lo Sq. Km 942.9 leh ram hring pangngai Open Forest Sq. Km 1375.63a zau awm anga chhut a ni. Undivided Champhai District bika ram hring zau zawng forest cover area chin chu ram zau zawng atanga chhuta za zela 74.53 a ni. Kum hnih kalta 2019-2021 chhunga Mizoram puma ram hring (Forest Cover) kan hloh zat chu Sq. km 185.51 a ni a; heng zinga Sq. Km 113.90 a zau chu Undivided Chanmphai District chhunga thleng a ni.

Vawiin meeting-ah hian District Level Committee on Fire Prevention member-te an tel a ni.