No.1416/2020-2021

Vawiin khan Health Minister Dr R.Lalthangliana hovin COVID19 Medical Operational Team Chairman Dr ZR Thiamsanga bakah Health Department hotute, doctor rualte leh Non-Governmental Hospital Association of Mizoram aiawhten phai atanga damlo lo hawte enkawl dan tur chungchangah meeting pawimawh an nei.

Dr.R.Lalthangliana chuan tun dinhmunah COVID19 lakah Mizoram kan la him nia a lan rualin hmun danga Mizoram mi leh sa awm mekte State chhunga engemawzat an lo luh tak avang leh an lo luh zel dawn avangin theihtawp chhuaha tanrual a ngai a ni, a ti. Health Department-a thawktute thawhrimzia a hriatpui thu sawiin an thawhrimna rah hi Pathianin mal a sawm nia a ngaih thu Health Minister chuan a sawi a. Him nia kan lan lai hian zan hnih khat thil thuah COVID19 positive nei thei reng kan nih hriat erawh a tul a, theihtawpa fimkhur reng a ngai a ni, a ti.

Dr ZR Thiamsanga chuan meeting koh chhan sawifiahin pawn lam atanga lo haw mek zingah natna khirh tak, a bik takin cancer natna vei, sawrkar quarantine hmun emaw, mahni ina quarantine emaw rem lo, hospital-a admit ngei ngei ngaite chungchang thu ngaihtuah a ngaih thu a sawi a. ZMC -in a mamawh ambulance neih dan tur te, sawrkar hospital dang te leh private hospital-te thawhho dan tur chungchang pawh inrawn tlan tul a tih thu a sawi.

Uluk taka sawihona hun hman a nih hnuah he an inrawnkhawmna eng atang hian ram pawn atanga lo haw natna khirh zual vei mek damdawi ina awm (admit) mamawhte awmna tur hospital leh anmahni enkawl zui zel dan tur kaihhruaina sawrkarin rang taka a tihchhuah tur thu Health Minister hian a sawi a ni.

ZMC tan bik ambulance mamawh chu rang taka ruahmanna siam a nih tur thu meeting-ah hian ngaihthlak a ni a. District hrang hranga COVID Care Centre (CCC) leh Dedicated COVID Health Centre (DCHC) ruat a nih dan ngaihthlak niin hemi chungchang hi May 11-ah Mizoram Sawrkarin hriattirna (notification) a tichhuak tawh a ni. Aizawl Civil Hospital tan khum 10 awmna tur ICU neih dan tur ruahmanna pawh thui tak kalpui a nih tawh thu sawilan a ni bawk.

Attachment

  • Loading attachment...