Vawiin khan Chief Minister Conference Room-ah Health & Family Welfare Department chuan Health Minister Pu Lal Thanzara hovin tunhnaia World Health Organization in hrilenga a puan tak EBOLA chungchang thlirhona hun an hmang.

Dr. Pachuau Lalmalsawma, State Nodal Officer, IDSP chuan Ebola hian India ram alo la thleng lo ni hriat ni mahse, tunlai khawvelah inkalpawhna leh zin veivah a awlsam tawh avangin he thil hian kan ram a lo la thleng lovang tih a sawi theih loh va, chuvangin mipuite pawh lo chi-ai mai lo va fimkhur dan turte kan lo hriat lawk a tul hle niin a sawi. Ebola natna hi tun dinhmunah chuan India ramah vei an la awm lo ni a hriat a ni a. Health Department chuan a tul ang zela Sawrkar Laipui kaihhruaina ngaihchan ni se a ti a.

Ebola Virus hi tui, boruak leh chaw ei atanga kai chi a ni lo va. He natna avanga damlo leh thi te taksa atanga thisen leh tuihnang (fluid) lo chhuak atanga kai theih a ni a. Mihring damlai taksa atangin zun leh ek, thisen, leh pem leh pem insik emaw mucouse membrane awmna mit, hnar, ka leh serh-ah te kai a nihin awlsam takin an inthlahpung a, he natna hrik hian thisen zamte ti chhiain thisen vawngthatu (platelets) a ti hniam thuai a. Thiput rehtheilo a siam nghal thin. A enkawlna hi chiang taka siamchhuah theih ala nih loh avangin mithiamte pawh an fimkhur hle a. Hetiang hrilenna rama chengte emaw, zin emaw te nena inchenpawlhte chuan a rang thei ang bera damdawiin lama in entir vat a tul thin a ni.