Vawiin khan Health Department Programme hrang hranga hmalakna kal lai thlirhona Review Meeting neih a ni a. Review Meeting hi Chief Minister Conference hall-ah neih niin Health Minister Pu Lal Thanzara leh Pi L.Tochhawng, Chief Secretary ten an hmanpui a ni.
He Meeting-ah hian Dr.K.Ropari Principal Director, H&FW chuan Mizorama Nausen thihna (IMR) kaihhnawiha Mizoram chhim lam fanga a zinna report a pe a. Pi Ropari hian Chhim lam District pathum Lunglei, Lawngtlai leh Saiha a hriselna kawnga mipuite dinhmun leh thawktute dinhmunte leh hmachhawp tul te a tarlang tel bawk.
Dr. Zarzoliana, State Nodal Officer, Malaria pawhin report pe in kum dang aia Mizoram-a Malaria a hluar thu te, nikum 2013 khan June thla thlengin mi 3578 in Malaria an vei laiin kumin June thla chhung ringawt pawhin Malaria vei mi 6297 lai hmuhchhuah an nih tawh thu te a tarlang a. Dr. Zarzoliana chuan Malaria hi kum dang zawng aia kan state thenawm-ah pawh a hluar thu a sawi bawk a, a dona kawnga nasa lehzuala tanlak a ngaih thu leh hemi atana ASHA lak belh leh a awmsa te tangkai lehzuala hman an tul thu a tarlang.
Medical College chungchang pawh sawiho a ni a. Report petu Dr. Lalbiakkima, Director DHME chuan Medical College atana Application pawimawh hrang hrangte pawh peihfel a nih thu te, August thla chhunga Sawrkar Laipui Ministry of Health & Family Welfare-ah thawnthlak a nih tur thu te a sawi a. Medical College dinna atana thil pawimawh, Anatomy, Physiology, Biochemstry Department atana thawktu staff te leh an hlawh tur chungchang te, Director thlan chungchang, Revenue Landlease leh Educational Programme bakah thil tul dang tam tak sawiho a ni bawk.
He hunah hian tunlaia natna hlauhawm tak Ebola chungchang te, Food & Drugs chungchang, Aizawl Civil Hospital tih changtlunna tur leh rualkhai zawka Medical Officer posting siksawi dan tur te, NPCDCS-hnuaia Lunglei huamchhunga Cancer Programme kalpui dan turte bakah NEC Priority Projects leh hna kal lai te sawi ho a ni bawk.
Health Department hotute leh Programme Officer hrang hrangte an kim hle.
