Vawiin khan NLUP Implementing Board (NIB) Chairman Pu J.H.Rothuama hovin a office ah NLUP atanga ZOHANDCO hmalakna tih chakna tur leh hlawkna neia an kal theihna tura ruahmanna siam dan tur sawiho a ni a. Hemi rual hian central sorkar North East Region Textiles Promotion Scheme(NERTPS) hnuaia Industries department in Mizoram handloom industry tih hmasawn na tura project a neih pawh thlir ho a ni.

He meeting ah hian NIB Chairman chuan Handloom sector chu Mizoram tan sum hnar pawimawh tak a nih bakah thalai te tan eizawnna kawng hawn belhtu tur a nih avangin ram pawn lam thlenga market nei turin Mizoram handloom industry kalphung siam danglam a tul thu a sawi a. ZOHANDCO Chairman Pu R.Vanlalvena chuan ZOHANDCO in harsatna hrang hrang a neihte tarlangin ram pawn lama market nei tha turin tuna laduang hman lar acrylic aiah cotton leh silk hman uar deuh deuh a pawimawh a ti a. ZOHANDCO kut tih chak nan 15% discount a ZOHANDCO in puantahtu te tan raw material a hlawma a lak theihna tur te, puantaha eizawng 10 chuang awmna khaw tinah la banna warping drum dahsak leh puantahna loom hman pawh khawl tha zawk Jacqard a thlak chhoh te chu hmalakna tur pawimawh te a ni a. Hemi atan hian ZOHANDCO in revolving atan sum a mamawh te chu NLUP atangin interest free loan kum 5 chhunga rulh turin ngaihtuah sak ni se, tiin vawiina NIB Chairman hova meeting chuan ruahmanna an siam a ni.

Hemi rual hian Mizoram handloom industry tih hmasawnna tura Industry department in central sorkar NERTPS hnuaia cheng vaibelchhe 17 man project a siam chu central sorkarin a pawmpui tawh a. Mizoram hi handloom ah Centre of Excellence atan din chho turin hma lak mek a ni bawk.