Vawiin chawhnu khan Minister of State for AH & Vety Pu C. Ngunlianchunga chuan Lawngtlai a State Veterinary Dispensary leh Vety Depatment Farmer Training Centre chu a hawng.

Minister chuan Mizoram in sa thianghlim eitur a hmuh theih nan leh kan mamawh phuhru zo a thar theih nan Vety Department chuan theihtawp a chhuah thu a sawi a, vawiin a kan hawn tak Dispensary leh Training Centre pawh Lawngtlai District a ran vulhtuten tangkai taka an hman theih ngei a beisei thu a sawi.

AH & Vety Department hnuaia hmalakna hrang hrang te tarlangin Minister chuan tunah hian NLUP hnuaiah vawk note singnga chuang sem hmabak a la awm a, chutih laiin RKVY hnuaiah vawk note sangli chuang sem a la tul bakah Project dang atangin vawkpui vulh tur chhungkaw eng emawzat thlan an ni bawk a, vawk note mamawh khawp Mizoram chhungah kan hmuh si loh avangin State dang atang leh rampawn atanga chawkluh tuma hma lak mek a ni a, a him dam ngei lak a nih theih nan ramri ah Medical Test neih vek a ni ang a ti. Hei bakah hian Bawng vulh tur pawh Shillong leh a chhehvel atangin a chi tha ngei lakluh tura hmalak mek a ni a, hetah pawh hian Vairengte ah an chawlh hahdamna tur In sak mek niin chuta tang chuan a vulhtu tur ten an duh an thlang dawn a ni, Ar note lei nan Mizoram hian kumtin Rs. 4 core kan sen thin avangin Tanhril ah Ar note keu tir theihna tur Farm, Andhra Pradesh lama Ar vulhtu Farm tha tak te nena tang hovin siam mek a ni a, he hmun atang hian thla tin Ar note singli vel thar theih tum a ni. He Project hi kumin kum tawp lamah emaw nakum kumthar tirah emaw hawn hman tum a ni. Ramri Kawn-a ranchaw siamna hmun kan neih mekah hian ni khat ah ran chaw tonne 5 vel siam theih a ni a, hei hi kan la in daih tawk loh avangin NABARD atangin ran chaw siamna hmun thar siam a nih tur thu leh; Ar chaw man a san avanga NLUP hnuaia Ar vulhtuten harsatna an tawh mek pawh sawrkar in kawng a zawng sak mek a ni a ti bawk.

Technical report petu Dr. Lalnunhlima Ralte, DVO Lawngtlai chuan Dispensary chu Central Sorkar sum cheng 12.06 lakh senga sak a nih thu a sawi a, Farmer Training Centre thung hi chu National Programe for Cattle and Buffalo Breeding sum atanga sak a nih thu a tarlanga, Training Centre ah hian mi 80 vel an leng thei a ni.

He hunah hian Lawngtlai Bawrhsap, LADC CEM leh Department tin a Head of Office te bakah midang thahnem tak an tel a ni.