Pu P.C. Lalthanliana Minister Horticulture chuan nimin khan Chite a Integrated Horticulture Training Centre sak mek a tlawh in hnathawh chhunzawm dan turte a en pui a hemi pah hian Horticulture hma lakna hrang hrang SCION Bank, Rose shed, Orange Nursery leh Pa chi (Mushroom) siamna hmun te a tlawh a ni.

Training Centre hi 2012 a NEC hnuai atanga fund cheng 202.16 lakh hmuh atanga sak a ni a, tun kum 2014 a zawh tur a beisei a ni. He centre ah hian lonei mite thiamna an mamawh ang training pek na tur leh Field Staff te practical training na tur hmun pawimawh tak a nih dawn bakah state pawn hmun hrang hrang atanga lo kal thin field visitor te tana hman tangkai tur a buatsaih a ni. Building ah hian Hmeichhia leh Mipa Hostel awmin mi 18 an thlen theih dawn a, Dining Hall, Kitchen, Administrative room leh Training hall te a nei dawn a ni.

SCION Bank hi Israel Technology hmanga ser chi tha a mit (bud) zawm tur lakna hmun a ni a, Israel mithiamte ngeiin an rawn din niin a hmasa ber atan tun kum khan nuai khat vel pek chhuah a niin kumthar lam ah phei chuan nuai nga (5 lakh) pek chhuah theih tur a hmalak tur a ruahman a ni a, heta tang hian lonei miten ser tiak hrisel tha tak leh dik tak ngei an phun theihna tur a ruahman tum a ni. Mimal tan pawh ser tiak hi sawrkar rate a lei theih in a awm reng a ni.

Rose shed hi kum 2005 a din niin heta tang hian kum tin cheng nuai tam tak lei chhuah thin a ni, foreign ah te ZOPAR kaltlang a thawn chhuah thin a ni. Nikhat ah rose par 800 atanga 1000 vel lak thin a ni.

Pa (Mushroom) chi siamna hmun hi a tangkai em em a, pack khat hi Rs.20/- a lei theih a niin thla khat ah packed 1000 vel siam chhuah thin a ni. Hei pawh hi mimal ang leh pawl anga a mamawh tan sawrkar rate a dawr theih reng an ni bawk.