284/2023-2024

Aizawl, 2nd May, 2023 : Vawiin khan SAD Conference Hall, MINECO ah Mizoram a COVID-19 hripui dinhmun thlirho a ni a. He hun hi Health & Family Welfare Minister Dr R. Lalthangliana'n kaihruaiin, Health & Family Welfare Board Vice-Chairman Dr ZR Thiamsanga, MLA, H&FW Principal Secretary Pi Esther Lalruatkimi bakah Health & Family Welfare Department official pawimawh dangte leh ZMC hotute an tel a ni.

Thutkhawm kaihruaitu Health Minister Dr R. Lalthangliana chuan hun engemaw chen COVID-19 hri kai thar kan neih tawh loh hnuah April thla atang khan an awm thar leh a, tun dinhmunah phei chuan hmarchhak state 8 zinga positive case nei tam ber kan ni a, hengte hi awareness kan neih that zara kan in test that vang te pawh niin a hriat a, mipuite leh official-te tan pawh chi-aina tur thil a la awm rih lo niin a lang a, hetih rual hian kan hun tawng tawhte atangin kan fimkhur chuan kan inveng thei tih a hriat a, hripui laka invenna kan hriat tawhsa te, a bik takin hmai tuamna (mask) vuah uluk kha kan ngaih pawimawh thar leh chu a pawimawh dawn a ni, a ti a. Engemaw lo thleng thut thei thilah kan talbuai loh nan phili si lova kan lo inruahman lawk erawh a tul a ni a ti bawk.

He thutkhawmah hian COVID-19 chungchanga Mizoram dinhmun uluk taka sawiho a ni a, hmalam hun hriat lawk a nih loh avang leh thil lo thleng leh thei turah damlote enkawl dan tur leh a hmachhawn dan tur, lo inruahman dan tur siam tha tih niin a buaipuitu turte an inruat nghal a, damdawi leh hripui dona hmanraw hrang hrang kan neih mek dinhmun zirc hiana a tul anga ruahmanna siam nghal tha tih nih bawkin, puipunna hmunah mask vuah tha tura mipuite inzirtir leh a tul tih sawi a ni bawk.

October ni 29, 2022 hnuah nimin khan COVID-19 hri kai mi pakhatin nunna a chan tih meetingah hian tarlan a ni a, vanduaithlak taka nunna chan ta hi damlo natna khirh tak tuar sa a ni tih tarlan a ni bawk.

Tunhnaia Mizorama COVID-19 positive hmuhchhuah tharte hi symptom nei deuh vek an ni a, travel history nei awm lovin, tualchhunga hri kai nia hriat vek an ni thung. Hri kai hmuhchhuah thar zingah naupang kum 15 hnuai lam leh kum upa lam an tam hle bawk a ni.

COVID-19 vaccine hi sawrkar laipuiin a thlawnin min pe tawh dawn lo tih tarlan niin, Mizoram sawrkarin kan mamawh angte a lei ve zel a ngai tawh dawn a, COVISHIELD hi siam chhuah a ni tawh lova, COVAXIN leh COVOVAX vaccine hman a ni tawh thung a, RT-PCR test kit leh Covid-19 hri kai seriouste enkawlna tur damdawi man to chite a tul anga lei turin NHM in ruahmanna an siam fel tih tarlan a ni bawk.

Zoram Medical College-ah COVID-19 hri kai damlote enkawlna tur ICU khum 5 leh ward pakhat (khum 10) la zuah reng a nih thu tarlan niin tun dinhmunah ICU ah damlo pakhat, Ward ah damlo pakhat enkawl mek an ni a, ICU leh ward te hi a tul anga tihlen theih tura ruahman sa an ni. District hospital zawng zawngah daktawr leh thawktu dangte training tha tak pek an nih tawh avangin hri kai damlo enkawl kawngah pawh ziaawm beisei tawh a ni.

April thla chhunga COVID-19 hmuhchhuahte Genome Sequencing Result dawn tawhah Omicron variant chi thum – XBB.1.16.1, XBB.1.16 leh XBB.1.9.1 hmuh a nih thu report a ni a, heng zinga pahnih - XBB.1.16.1 leh XBB.1.16 te hi variant tharlam lehzual niin Omicron variant dangte aiin inkaichhawn a awlsam zawk a, naupang leh kum upa lamah a thawk bik tih sawi a ni a. Lower respiratory tract a thlen thlak theih avangin a danglam bik tih tarlan niin mipuite tan chi-aina tur erawh a awm lova, COVID Appropriate Behaviour tha taka zawm a pawimawh hle tih tarlan a ni.

IDSP, H&FW report danin kumin April thla khan COVID-19 positive 82 (Aizawl – 75, Kolasib – 3, Serchhip – 2, Khawzawl – 2) hmuhchhuah an ni a, nimin May ni 1 khan COVID-19 positive 34 (Aizawl – 18, Kolasib – 9, Serchhip – 7) hmuhchhuah an ni.