11/2025-2026 

Aizawl dated 1st April 2025: Vawiin chawhnu khan Auditorium, Directorate of Hospital & Medical Education, MINECO-ah Mizoram Universal Health Care Scheme (MUHCS) chungchang zir hona hun buatsaih chu Pi Lalrinpuii, Minister, Health & Family Welfare Department chuan a hmanpui a. Dr. Lalthlengliani, Principal Director chuan hun kaihruaiin District tin a Chief Medical Officer, District Medical Superintendent, Community Health Centre leh Primary Health Centre-ah thawktute an tel a ni.

Health Minister Pi Lalrinpuii chuan kuthnathawktute leh khawsak harsate dinhmun chawikan leh an harsatna chhawk zangkhai chu Sawrkar ngaih pawimawh berte zing ami a nih thu sawiin chumi kawngah chuan hmalakna hrang hrang kalpui a nih thu a sawi a. Mirethei zawkte chhawmdawlna mamawh pui ber pahnih chu chhiattawhna leh dam loh nikhua hi a ni tiin, chhiattawh chungchang ah thingtlang mipuite in lum ah Sawrkarin ruang a phurh thlen sak tawh hnuah, dam loh nikhua a sum sen phuhrukna -'Mizoram Universal Health Care Scheme' chu ruahman leh tlangzarh a nih tawh thu sawiin a taka mipuiin tangkai taka an hman theih nan Health Department hnuai a thawktute an pawimawh hle thu a sawi. Pi Lalrinpuii chuan Sawrkar hnathawk kan nih anga kan kutzal a mawhphurna tlate hlenchhuah kawngah theihtawp kan chhuah a pawimawh thu sawiin khawtlang leh mipui hriselna kawnga mawhphurna pawimawh tak chelhtu Health Department-a thawktute chu an thiamna leh theihnate, dawhtheihna leh inpekna thuk tak nen, khawtlang tana hmang chhuak zel turin a fuih bawk a ni.

Health Minister chuan chhuanlam hrang hrang avanga Primary Health Centre emaw Community Health Centre emaw District Hospital atangin khawpui lian zawk a dam lo enkawl hna hlanchhawn a nih hmain an inentirna hmasaah thawktuten theihtawp chhuah a inenkawl hna an kalpui hmasak thin a pawimawh thu a sawi a. Hetianga hna kalpui a nih chuan Mizoram chhunga PHC-a khum 500 bawr vel leh CHC-a khum 270 bawr velte chu tangkai zawk a hman a nih tur thu leh khawpui Hospital-a khum indaih lohna avanga harstana thleng thin chu nasa tak a chhawk zangkhai a nih tur thu a sawi a. Hetihrual hian kan theih bak harsatna a awm a nih erawh chuan dam lo enkawl tura hmun lian zawk a inhlanchhawn chu a tul hun ah chuan inthlahrung lo turin a chah bawk a ni. Hospital pakhat atanga Empanelled Hospital danga dam lo refer awlsam zawka kalpui a nih theih nan Medical Referal Board piah lam a Empanelled hospital Specialist Doctor-te thuthlukna chu pawm a nih tur thu Minister chuan a sawi. 

Health Minister chuan Mizoram mipui hriselna enkawlna changtlung zawk 'Mizoram Universal Health Care Scheme' hlawhtling taka kalpui nan Health Department thawmthat a pawimawh thu tarlangin chumi tur chuan Hospital, CHC leh PHC a dah belh tur Medical doctor 8, Nurse 300, Dialysis technician 10, Laboratory technician 10, X ray technician 15, Pharmacist 6, Public Relations Officer 4, Accounts Manager 3 leh Data Manager 15 lakna tur kalpui mek a nih thu a sawi a. Inkalpawhna tha hmang tangkai thiam a diagnostic (Natna zawn chhuah) lam a tan lak a pawimawh thu sawiin khawtlang ro hlu leh ui ngawih ngawih ni tur khawp a mi tangkai, thawhhlawk leh hna a inpe mi ni turin kalkhawmte a fuih bawk a ni.

Mizoram Universal Health Care Scheme inzirtirna hun ah hian Dr. Hmingthanmawii, Director, Health & Family Welfare, Dr. Ngurchamliana, Director, Hospital & Medical Education leh Pi Lalchhanhimi, Joint Director (Nursing) te chuan thu sawiin mipui hriselna enkawl hna thawhna kawngah inpekna thuk tak neih leh hawihhawmna nun pui tlat a pawimawh thu an sawi a. Vawiin a kal khawmte chu midangte hnen a MUHCS pawimawhna leh a kalphung zirtirtu tur an nih thu leh he scheme hlawhtlinna tur thui tak innghahna an nih thu an tarlang bawk a ni.