DIRECTORATE OF INFORMATION & PUBLIC RELATIONS, Government of Mizoram, India

12/2025-2026

Lunglei, 2025 Ṭau thla ni 1: Lunglei Municipal Council (LMC) huam chhunga ward hrang hrangte tana faina leh thianghlimna kawnga intihsiakna, LMC Award 2024-2025 lawmman semna hun chu vawiin khan Lungleia Convention Centre Convention Hall-ah buatsaih a ni a. Lunglei High Powered Committee (HPC) Vice Chairman Pu V. Malsawmtluanga'n khuallian niin hun a hmanpui.

Lunglei HPC Vice Chairman Pu V. Malsawmtluanga chuan hriselna nei turin fai a ngai tih sawiin, sum tam tak senga LMC-in faina kawnga inelna a buatsaih chu lawmawm a tih thu leh fai inelna buatsaih chuan faina kawnga harh tharna nasa zawka a thlen a beisei thu a sawi a. Faina chu LMC leh khawtlang hruaitute mawhphurhna chauh ni lovin, mi tin mawhphurhna a ni tih hre thar turin kal khawmte chahin, mahni tihbawlhhlawh ni kher lo pawh tifaitu nih tum ṭheuh turin a chah a ni.

HPC Vice Chairman chuan bawlhhlawh reng reng a bawma paih kawngah leh tui dah khawlna siam kawngah hma sawn a ṭul tih sawiin, ei tur vawn thianghlim kawngah te, mahni taksa enkawl fai kawngah leh thawmhnaw enkawl fai kawngah te, vantlang hmunhma, zun in leh toilet enkawl fai kawngah te hmasawn zel a ṭul thu a sawi a. Zin kawngah lirthei nalh tak tak tukverh aṭanga kawng kama bawlhhlawh paih chhuah mai a la tam chu veiawm a tih thu sawiin, HPC pawh faina kawnga hma la turin a inhawng reng tih a sawi a. Mipuite chu mahni khawsakna hmun ṭheuhvah bawlhhlawh siam lo tur leh a tifaitu nih tum ṭheuh turin a chah a ni.

He hun hi LMC Vice Chairman Pu K. Lalrinawma'n a kaihruai a. Executive Councillor Pu Zorinsanga Hmar chuan inlawmna thu sawiin, inhmelhriattirna hun a hmang a. United Pentecostal Church (North East India) Lunglei District Secretary Rev. PC Lalfakawma'n hunserh hmangin, Lunglei Sub-Headquarters YMA Zaipawl te'n hawnna hla an sa a. LMC Chairman Pu Lalzuithanga chuan thu sawiin, LMC Award 2024-2025 hlawhtlin nana tha thawhtu zawng zawng chungah lawm thu a sawi a. LMC chuan faina kawngah hma a la chho zel dawn tih sawiin, sawrkar office hrang hrangte, ward committee-te, local council-te, pawl hrang hrang leh mi tinte thawhpuina leh ṭawiawmna a ngen a ni.

He hunah hian LMC Chief Executive Officer Pu Donny Lalruatsanga'n LMC Award buatsaih dan report pein, result a puang nghal a. Sub-Headquarters YMA President Pu K. Lalfakzuala pawhin thu sawiin, zaithiamte (group leh mimal) zai ngaihthlak a ni bawk.

LMC Award 2024-2025-ah hian LMC ward 11 zingah Ward No. 2 (Serkawn leh Zohnuai) chu ward fai berah thlan niin, cheng nuai 3 an dawng a. Ward No. 1 (Pukpui leh Zotlang) chu pahnihna niin, cheng nuai 2 an dawng a; Ward No. 9 (Salem leh Lunglawn) chu pathumna niin, cheng nuai 1 an dawng thung a. Ward No. 11 (Lungpuizawl, Zobawk North leh Zobawk South) te chuan consolation prize an dawng bawk.

LMC Award 2024-2025 hi LMC huam chhunga ward 11-te faina leh thianghlimna kawnga an inelna leh intihsiakna atana buatsaih niin, tun hi a ṭum khatna a ni a. LMC huam chhunga local council (LC) 24 awmte chu a bial (ward) angin an inel a. Endiktu (Panel of judges)-ah hian Convener, LMC Secretary Pu Lalrinawma kaihhruaina hnuaiah Sub-Headquarters YMA President, Sub-Headquarters MHIP President leh District MJA President te awmin, ward/veng fai endikna hi kalpui a ni.

LMC Award 2024-2025 lawmman semna hunah hian LMC-a elected councillor leh official-te, sawrkar official-te, LMC ward hrang hrang ward committee-te, local council member-te, tlawmngai pawl hrang hrang hruaitute, MJA member-te, zirlaite leh chanvo hrang hrang neite an tel a ni.

Attachment