13/2025-2026 

Khawzawl, dated 2nd April 2025: Vawiin chawhma dar 11 khan DC Meeting Hall-ah ruihhlo do chungchang sawi ho turin Narcotics Coordination Centre (NCORD) an thukhawm a, Khawzawl DC Pu K. Vanlalthiana'n hun a kaihruai.

Dy. SP Pu R. Vanlalzawma'n NCORD thil tih tawh te a sawi a, awareness campaign sikul leh hmun danga an lo kalpui thu te, ruihhlo an man tawh dan leh an kalpui zel dan te a sawi a. Pu F. Lalliangura, Inspector, Excise and Narcotics Station hnen atangin zu leh ruihhlo chi hrang hrang man dan report ngaihthlak a ni bawk. Hemi zawh hian Police leh Excise and Narcotics lamin ruihhlo do kawnga harsatna an tawh thin te, ruihhlo man a tlawm avanga ruihhlo ngai an tam tawh thu te, ruihhlo vanga man court-ah thiamloh chantir a har tawh thu te leh thawhhona lama harsatna an tawh te an sawi a, mi tam thei ang berin ruihhlo do chungchang an hriat theih nana awareness nasa zawka kalpui a tul thu an sawi bawk. Village Council (VC) member te hnenah inhrilhhriatna leh inzirtirna tha tak pek a tul thu an sawi ho a, ruihhlo do chungchangah chanvo pawimawh tak an nei thei a ni tih an sawi bawk.

DC Pu K. Vanlalthiana chuan NCORD hnathawh hi pawimawh a tih hle thu sawiin member te hnathawh fakawm a tih thu a sawi a, Khawzawl district-ah ruihhlo leh a ken tel buaina leh harsatna chi hrang hrang an hneh ngei theih nan theihtawp chhuah turin member te a fuih bawk a ni.

Meeting-ah hian department hrang hrang aiawh bakah YMA Sub-Headquarters President Pu PC Rosiama an lo tel a ni.