641/2022-2023
Aizawl the 26th May, 2022 : Vawiin khan SAD Conference Hall, MINECO ah Health Minister Dr. R.Lalthangliana sawmna angin UNAIDS leh CDC (Centre for Diseases Control and Prevention) atangin an hotute Mizoramah an lo kal a, HIV /AIDS dona kawnga inrawnkhawmna hun hman a ni. He hun pawimawh tak hi Health Minister Dr. R.Lalthangliana’n kaihruaiin, sawrkar Department mi pawimawh tak tak te, Kohhran hruaitute leh CYMA hruaitute bakah Community aiawhte nen he hun hi hman a ni.

Health Minister hian kan rama HIV/AIDS punlun mek hi Department pakhat chauh emaw, pawl pakhat chauh emaw do hneh chi a ni lova, kan zavaia mawhphurhna a nih thu leh kan do tlan a tul zia a sawi uar hle a, chumi ti thei tura he inrawnkhawmna hun pawimawh tak pawh hi a bul tanna atana buatsaih a nih thu a sawi.

Covid do nan Sawrkar, Kohhran, Khawtlang leh mimal tinte tang tlanga covid kan tukzal ang deuh hian HIV/AIDS pawh hi kan tan tlan chuan kan tukzal theih ngei a beisei thu a sawi. He hunah hian community aiawh ten an ngaihpawimawh zawng leh Sawrkar, Kohhran leh Khawtlang laka an beiseite sawi chhuakin hun an hmang bawk a ni. Hemi zawhah hian kalkhawm zawng zawngin Pu R.Lalramnghaka, IAS, Health & FW Secretary kaihhruainaa sawihona hun neiin resolution tha tak tak an siam a. Drugs Abuse leh HIV Prevention hi High School ah zirtirna pek nise, HIV+ ten an dinhmun hriatchian nan Viral Load Machine dah te, Jail a lut turte chu HIV/Hepatitis B&C test neih bakah HIV/AIDS laka fihlimna leh inenkawl dan tur hrang hrangte sawiho niin thutlukna siam a ni.

He hunah hian Dr. Lalthlengliani, Project Director, Mizoram State AIDS Control Society (MSACS) chuan HIV/AIDS chungchanga Mizoram dinhmun a sawi a, hmalak tawhna hrang hrang leh hmalak zelna turte fiah takin a sawi bawk.

He hun hmang tur hian UNAIDS India office atangin Dr. David Bridger, Country Director leh Dr. Nandini Kapoor, Sr. Program Advisor te lo kalin, CDC atangin Dr. Melissa Nyendak, Program Director, Dr. Sudhir Chawla, Public Health Specialist (Prevention) leh Sr. Ramesh Allam, Public Health Specialist (Treatment) bakah Ms. Abhina Aher, Technical Specialist, Key Population, UW-ITECH te hian an rawn tawiawm bawk a ni.