No.1038/2021-2022

Aizawl, 18^th June, 2021 : Vawiin khan SAD Conference Hall, MINECO ah Mizorama COVID-19 inkhuahkhirhna kalpui mek thlirho a ni a, he hun hi Health & Family Welfare Minister Dr. R. Lalthangliana'n kaihruaiin,, MOT Chairman Dr. ZR Thiamsanga, MLA,  AMC Mayor Pu Lalrinenga Sailo, Chief Secretary Pu Lalnunmawia Chuaungo, bakah COVID-19 dona kawnga hmalatu department hrang hrang hotute,  Indian Medical Association, Medical Operational Team, Jt. NGO Coordination Committee  leh Mizoram Kohhran Hruaitute Committee (MKHC), Local Task Force aiawhte an tel.

Vawiin thlirhonaah hian mizorama Lockdown kalpui mek chungchang sawiho a ni a, kan dinhmun thlirin vawilehkhata inthlahdul vek chu a la him tawk lovah an ngai a, karleh lama kan awm dan tur chu uluk tak leh fimkhur taka ruahmanna siam tha tih a ni a, rawtna hrang hrang sawiho niin State Executive Committee on State Disaster Management Authority in a tul angin ruahmanna an siam ang.

Sample test chungchang sawiho niin hri kaite a hma thei ang bera hmuhchhuah chu a pawimawh vangin mahni inringhlel ten awlsam taka sample an test theihnan tuna kiosk kalpui mek bakah Vanapa Hall-ah sample test theihna tur a rang thei ang bera ruahman tha tih a ni a, a tul angin hmun dang remchang dap nghal ni bawk se an ti a. Sample hi a thlawna test turin ruahmanna siam tha tih a ni a. containment Zone a awmte leh Positive awmna chhungkuate chu a rang thei ang bera sample test vek zel tha tih a ni.

Vaccine pekchhuah chungchang pawh sawi niin, a tam thei ang berin vaccine an dawn theih nan tun aia uar zawka vaccine pekchhuah tam dan tur thuneituten ruahmanna an siam ang. Kum 45 chung lam vaccine la la ve lo tan Bawngkawn South YMA Hall leh Dawrpui Multipurpose Hall-ah vaccine a lak theih reng tih tarlana ni bawk.

Vawiin meetingah hian COVID-19 hri leng laka kan himna tura dan siamte leh SOP te pawh a tul anga ennawn a, siamthat ngai laite siamthat a tul tih sawi a ni bawk.

Mizorama positive damchhuakte (recovery rate) a hniam bik chhan chu India ram hmun dang aia fimkhur leh uluk zawka kan kal vang a ni tih tarlan a ni a, recovery rate hniam angin lang mahse hlauhthawn tur a awm loh thu leh mizorama discharge protocol hman mek  hi a him zawk hle thu tarlan a ni.