No.1037/2021-2022
Aizawl, 18th June, 2021 : Vawiin chhun dar 12:36 khan Mizoramah COVID-19 hrik chhuak thar Delta Variant B.1.617.2 a awm tawh thu official-a dawn a ni a. National Centre for Disease Control (NCDC), Delhi in Dr. Pachuau Lalmalsawma, IDSP Surveillance Officer, State Nodal Officer on COVID-19 hnenah Mizoramah strain thar hmuhchhuah a nih thu an rawn hriattir a ni.
Mizoram chhunga Covid-19 hrileng mek ah hian Variant strain a awm tawh em tih hriat nan COVID-19 hri kaite sample hi National Institute of Biomedical Genomics (NIBMG), Kalyani, West Bengal ah Department of Microbiology, Zoram Medical College chuan Whole Genome Sequencing turin an thawn thin a, Mizoram atanga tunhnaia sample thawn te zinga sample 4 ah te variant strain hmuhchhuah an ni a, he strain hi B.1.617.2 (Delta Strain) vek an ni. Heng sample laknate hi mipa vek niin kum 18 - 45 inkar an ni.
SARS-CoV-2 Delta variant strain hi nikum December thla khan India ramah hmuhchhuah a ni a, strain dang te aia a danglamna bikte chu:
1. Mithiam te chhut danin, strain dang te aiin za a sawmnga (50%) laiin inkaichhawn a awlsam bik a ni.
2. He natna kai/veite hi a let thum deuh thaw (2.61) in damdawi ina awm ngai an tam bik a ni.
Dr Pachuau Lalmalsawma chuan Delta strain hi India ram state thenkhata hluar a nih angin hun engemaw kalta atang khan a lo luh tawh ngei rin a ni tawh a, NCDC in an rawn finfiah ta a ni, a ti.
