No.1036/2021-2022

Kolasib dated 18th June 2021: Vawiin chawhm khan Circuit House, Kolasibah Pu K.Lalrinliana, Minister of State for Food, Civil Supplies and Consumer Affairs Department hovin Covid-19 hrileng dona kawng a Kolasib district dinhmun tlangpui thlir hona hun hman a ni a. He thutkhawmnaah hian Dr.H.Lalthlangliana, Deputy Commissioner, Dr. Lalhlimpuia, CMO, Dr. Doris Lalnunmawi Sailo, DMS, Pu Lallawmawma, Addl. DC, Pu C.Roțhuamluaia, Joint VLTF, Kolasib Town te an tel a ni.

Minister Pu K.Lalrinliana chuan Kolasib district chu state thenawmte nen a inrina thui tak nei, inkalpawhna hrang hrang vil reng ngai chung si a hrileng do nana ruahmanna țha tak an la kalpui zel thei chu lawmawm a tih thu a sawi a. "Hetiang dinhmun thleng thei tur a tha thlah lova thawktu, sawrkar lam leh khawtlang hruaitute inkarah thawhhona țha tak a awm hi ka lawm tak zet a ni" a ti. Minister chuan Covid-19 hrileng chu Department pakhat bik do hneh theih a nih loh avangin Sawrkar Department hrang hrang țanrual a pawimawh thu a sawi a, khawtlang leh tlawmngai pawlte nen pheikhai rual tak a, kal fawr bik awm lova hma lak chhunzawm zel a pawimawh thu a sawi.

Thutkhawmnaah hian Covid-19 hrileng dona kawnga hmalakna thar țhenkhatte tarlan niin mipui him zawk nan nitin mamawh phur lirtheite khaw pawn a an dinna tur ruahman a nih dan te, mipui pung khawm an awm loh nan bazar hmun hawn hunbi thawl tak a siam a nih dan te leh Magistrate-ten zanah khaw chhung lunlai an vil țhin dan te sawi lan a ni.

Dr.Lalhlimpuia, CMO tarlan danin Covid-19 endikna chatlak lova kalpui tur chuan RAgT kit 10,000 leh TrueNat test kit 1,500 kawl reng ngai anga chhut a nih thu a sawi a Dr. Doris Lalnunmawi Sailo, DMS pawhin report pein tun dinhmunah Oxygen Cylinder 141 leh Oxygen Concentrator 17 awm mekin Kolasib District Hospital, DCHC leh CCC-a mamawh a la phuhruk rih thu a sawi bawk a ni.
Pu K.Lalrinliana hian nimin khan Bairabi South VLTF te hnenah in lam a inkhunghrang mek te țanpui nan buhfai bag 15 a pe a. Mini Stadium, Project venga sak mek chung chih chhunzawm dan tur endikin Kolasib khaw chhung a DRDA hnuai a hna kalpui mekte a endik nghal bawk a ni.