No.681/2020-2021

Health & Family Welfare Minister Dr. R. Lalthangliana hovin vawiin khan Secretariat Conference Hall, MINECO-ah Medical Operational Team in April ni 24, 2020 leh April ni 27, 2020 inkara Mizoram chhung district leh border hrang hrang an tlawhna report thlirho a ni.

Thlirhona hun sawihawngtu Health Minister Dr. R. Lalthangliana chuan COVID-19 hripui laka Mizoram tun thlenga harsatna lian tham tawk lova a la him theih nachhan chu Chief Minister Pu Zoramthanga kaihhruaina hnuaia awmze nei leh felfai taka ruahmanna tha taka kan kalpui vang a ni, a ti a. Health Department mai bakah department hrang hrang leh anmahni enkawltu Minister ten harsatna tawk lova chak taka hma an lak theih chhan chu Chief Minister in thil awmdan thlir thiam tak leh thil phal taka ruahmanna a siampui zung zung thin vang a ni a ti a, Finance department a chang tel hlauh bawk hi a lawmawm takzet a, kan awlsam phah hle a ni a ti a. Hun harsa leh khirh tak kan tawh laia ram hruaitu puitling leh ngaihtuahna hmang thiam em em kan nei hi kan vannei hle a ni a ti bawk.

Health Minister chuan COVID-19 dona hmanrua pawh India sawrkarin a thlawna min rawn pek awm mahse Mizoram sawrkarin kan lei hi cheng tam tak man a ni tawh a. Health department ringawt pawh hian hripui do nan cheng nuai 1500 vel kan seng tawh a ni a ti a, Chief Minister in kan hun tawng a hriatchian avang leh thahnem a ngaih vangin ZMC leh Hospital hranga kan hmalakna leh mamawh kan lei te hi a hlawhtlin theih phah a ni, a ti bawk.

Health Minister sawi danin vawiin thlengin COVID-19 dona hmanraw chi hrang hrang Ministry of Health & family Welfare (MoHFW), Indian Council of Medical Research (ICMR), HLL Life Care Ltd (HLL) leh Tata Trust atangin a thlawna dawn a ni a. MoHFW atangin N95 Mask 5500, Isolation Gown 500, Goggle 200, Gloves 1000, Hydroxy Chloroquine Sulphate 200mg tablet 70000, Azithromycin 500mg tablet 10000 dawn a ni tawh a, tunah hian MoHFW atanga kan dawn Oxygen D type cylinder 100 leh Oxygen B type cylinder 183 pawh Delhi atangin by road a rawn phurh mek a ni a ti bawk.

HLL Life Care Ltd atangin N95 mask 480 leh PPE Gown 100 dawn a ni tawh a, PPE Gown 5000 Bangalore atangin by road a rawn phurh mek a ni Health Minister chuan a ti a. ICMR atangin Viral Transport Medium (VTM) 2700, IgM Test kit 3840 leh IgG Test Kit 3840 dawn a nih bakah Tata trust atangin N95 Mask 5000 dawn a ni tawh a, Agva Ventilator 5 leh a ken tel HFNC 5 pawh Pune atangin New Delhi kaltlangin rawn phurh mek a ni a ti a, tun dinhmunah hian Mizoram sawrkar hmalakna vangin COVID-19 public health facilities dinhmun a tha rih a ni a ti.

Vawiin thutkhawmah hian Medical Operational Team fehchhuah thawhhnihna in an thil hmuh leh ngaihpawimawh chi hrang hrang an report te an sawiho a, chung zingah chuan Ramri, a bikin Myanmar nen kan inkalpawhna khan thenkhat ven hneh loh awm zeuh zeuh chungchang te, Village Level task Force te a bikin ramri a buk suala riak te mamawh chi hrang hrang leh thuam chak dan turte, Public Health centre ho thuam chak lehzual dan turte, ramri a duty VLTF leh khaw kilkhawra awm te mamawh bulpui a bikin tui thianghlim leh buhfai phuhruk dan turte, essential commodities awlsam zawka ramri a duty ten an lak theihna turte leh thilpawimawh tam tak an ngaihtuah a,a tul dan anga bawhzui zel tum a ni.

Heng bakah hian Indian Medical Association leh Mizoram Government Doctors’ Association tangkawpin lockdown (inkharkhip) hlih a nih huna inkaihhruaina tur an ruahmante thlirho a ni bawk.

Vawiin thlirhona ah hian Social Welfare Minister Dr. K. Beichhua, Medical Operational Team Chairman Dr. Z.R. Thiamsanga, MLA bakah Chief Secretary Pu Lalnunmawia Chuaungo leh Supply department leh Home department hotute, Health department hotute bakah IMA leh MGDA hotute an tel a ni.