Vawiin khan Chief Minister's Office Conference Hall ah Health Minister Pu Lal Thanzara hovin Health Department hotute leh Surgeon rualte'n meeting pawimawh tak an nei a, Mizorama cancer tam lutuk do let dan tur an ngaihtuah. Meeting-ah hian Aizawl Civil Hospital, Department of Surgery-a Head of Department ni mek Dr Saia Chenkual chuan powerpoint hmangin Mizorama cancer hluar dan leh a do let dan tha ni a a ngaihte a tarlang a ni.

Population Based Cancer Registry, Civil Hospital chuan kum 2003 atang khan Mizorama cancer data uluk takin a chhinchhiah a. He Registry in a tarlan danin cancer natna hrang hrang zinga Mizote thihpui tam ber chu pumpui leh chaw dawt cancer natna, a ni a. A bikin mipa ah pumpui leh chaw kawng cancer an tam lehzual. He natna hi a in tan tirha hmuhchhuah a nih chuan tihdam theih a ni. Cancer thihpui tam ber hi hmuhchhuah tlai vang a ni a, chuvangin a do letna tur hmanraw tha ber chu a in tan tirh te a cancer natna hmuhchhuah a ni.

Mizoramah cancer natna a hluar em avangin a stage tir lama cancer hi hmuhchhuah a nih theih nana tan lak chu he meeting hian tul a ti a. Damdawi in hnai vai awmlohna thingtlang khuaah khawl tha te hmuh mai tur a awm loh avangin, tam tak chuan a tlai tawh hnu a khawpui damdawiin lian pan chauhte, sum neih loh avanga damdawiin pan theilo te an awm avangin Mizoram hmun hrang hrangah cancer vei leh vei lo endik (screening) chu thil tul tak a ni a. Sorkar laipuiin mipui hriselna turin Health Programme hrang hrang a duan zingah Cancer Screening lam hawi programme a awm ve loh avangin he ruahmanna tipuitling tura sum tam tak mamawh chu engti kawng zawng emaw tala sorkar laipui atanga chawkluh dan ngaihtuah a, chak taka hmalak an rel a ni.

Meeting-ah hian Principal Secretary Health Pu RL Rinawma pawh a tel a ni.