Nimin tlai dar 3 khan Health Minister Pu Lal Thanzara, MIMER Core Committee Chairman ni bawk kaihhruaina hnuaiah CM Conference Hall-ah Mizorama Medical College hmasa ber tur MIMER dinna kawnga hma lak mekna te thlirho a ni a, hma bak la awm te sawiho a ni bawk.

Pu Lal Thanzara chuan kumin Academic Session-ah MBBS course tan anih ngei thei nan Sawrkar leh Department chuan tha thlah miah lovin, a theihna zawng zawng hmangin hma a la mek a, chuti chung chuan hma bak kan la nei a. Heng kan hmabak te hi a rang thei ang bera zawh tumin kan bei mek a, beiseina pawh kan nei sang hle a ni, a ti a. Department-a mawhphurtu ten chawlh pawh sawi lovin MCI a ni emaw, Ministry lam a ni emaw, a contractor satu lam a ni emaw, umzuiin, an dawr zel a, chumi rah chu MIMER ah a lang mek a, mahse a rah kan ngahhlelh em em chu kumin ngeia MBBS course kan tan thei hi a ni a, a ti a. MCI report chu confidential a nih angin engtin takin nge min ziah chu hriat ani lo chungin kan dinhmun chu a hma aiin a tha an tih thu kan dawng a, infrastructure leh thil dang chu a tha thawkhat nia an ngaih thu kan hria a, mahse zirtirtu faculty lamah chuan kan la tlin lo nia an sawi kan hria a. MCI duhdan engemaw chen kan tlin tawhin kan hria a, mahse zirtirtu lamah an tehfung kan la tling lo deuh a niawm a, hengte hi kan tlin ngei nan, a thei ang angin chak takin kan bawhzui mek a, kan tlin ngei pawh kan beisei a ni, a ti a. Union Health Minister Pu J P Nadda hnenah kar hmasaa hemi chungchang a thlenna ziaka a thawn, sawiin Health Minister chuan kan tlin lohna te hi tlin ngei turin Sawrkar chu a intiam thu leh Medical College tan anih ngei thei nan theihtawp min chhuahpui turin ziakin a thawn a, phone pawhin a bia a, a theih ang angin min puih a in tiam a, beiseina ka nei sang hle a ni, a ti a. Hmabak an neite leh la awm te a rang thei ang berah kan zawh thei nan, kan zavaiin kan tan ho a ngai a ni tiin Committee chu a fuih bawk a ni.

MIMER Principal-cum-Dean Prof. L. Fimate leh Dr. Jane Ralte, Nodal Officer MIMER hnen atangin kar hmasa lamah heng bawhzui tura mi pawimawhte Delhi-a an hmuh chungchang report ngaihthlak a ni a. Anni hian kawng engkima, heng hotu pawimawhte an dawrnaah theihtawp chhuah saka an mahni uaptu Rajya Sabha MP Pu Ronald Sapa Tlau chungah lawmthu an sawi a ni. Committee Member dangte chuan MIMER hlawhtlinna atan hma lak tawhna leh hma bak la awm te chu meeting-ah an tarlang a, heng te hi zau taka sawiho a ni.

Medical College tan phalna petu Medical Council of India chuan nikum kum tawp lam khan MIMER hi endikin Inspection an rawn nei a. Kumin April ni 4 khan MCI Inspection Team-in MIMER tlawh lehin an endik leh a. An thil hmuhdan te hi MCI lamah Confidential Report an thehlut tawh a, hemi Report behchan hian MCI in phalna a pe dawn a ni. MCI Inspection Team- in a hmasaa an lo kal leh tun tuma an lo kal inkarah hmasawnna tam tak an hmu thu te leh infrastructure tun thleng din tawh chu tha an ti thu te dawn a ni a, hengah hian an lawm hle tih hriat ani a. Zirtirtu tun thlenga lak tawh erawh in a la daih lova, chuvangin a rang thei ang berin heng zirtirtu la lak tur hi la vat turin thurawn an pe nia hriat a ni bawk.

MIMER thawktu lakna tur hi MPSC leh Health Department thla hnih kalta vel atangin buaipuiin, an kalpui mek a, tunlai hian Interview te pawh kalpui mek niin kartin deuh thawh result chhuak a awm a. Medical College a zirtirtu Faculty hi chhawr tur leh rawn zawm tur hmuh a harsa a. Department lam leh MPSC lamin theihtawp chhuahin national newspapers-ah zau takin faculty advertisement an tichhuak a. MPSC-in heng zirtirtu lakna tur hi MPSC history-ah a vawikhatna atan Mizoram pawn, Guwahati ah interview neiin, mi engemaw zat chu an la fel tawh a. Mahse, diltu erawh an tam em em lova, Department thenkhat phei chu diltu an awm lo a ni. Anni bakah hian MCI tehfunga college faculty ni thei Department a thawk mek Mizo doctor engemaw zat chu Deputation in MIMER-ah dan an ni tawh bawk a ni.