Tukin zingkar khan sentut leh sentutfang hri danna pek beihpui thlak (Measles-Rubella Vaccination Campaign) kal zelah H&FW Dept Lawngtlai District leh Downtown English School naupangte'n MRVC puanzarna rally neiin, Lawngtlai khawpui chhungah kawng an zawh.

He rally-ah hian Lawngtlai Chandmary Square atangin Lawngtlai Bazar Areopagy thleng kawng zawh a ni a. Downtown English School naupang 200 vel an tel thei a. Naupangte hian thuziak hrang hrang - "MR Vaccine i fate laktir ngei ang che" tih te, "Rualbanlohna leh thihna hial thlen thei Measles & Rubella um bo turin mi tin phei khai rualin" tih te leh "MR Vaccine hi a hlauhawm lo, i fate laktir ngei ang che" tih te chu mipui chhiar theih turin an keng lang a ni.

Kawng zawh tawpa Areopagy hmuna inkhawm tawi buatsaihah District Immunization Officer Dr S.Thaizi chuan rally kharna thu sawiin, sentut leh rubella natna um bo turin zirlaite'n tih theih tam tak an nei a, anmahni mai bakah, an naute hnenah hri danna la ngei tura an campaign zel chuan MRVC chu a hlawhtling ngei dawn a ni, a ti.

Measles-Rubella Vaccination Campaign hi naupang thla 9 pumhlum leh kum 15 inkarte hnena MR hri danna pek runpui a ni a. Lawngtlai District chhung Block hrang hranga PHC awmnaah te Medical Officer-te kaihhruaina hnuaiah beihpui thlak mek niin, vawiin (17.04.2018) hian Kawlchaw, Paithar, Mampui leh Khawmawi sub-centre-ah te hri danna pek runpui neih a ni ang a. District level-a campaign hawnna chu naktuk (18.04.2018) hian Don Bosco School, Lawngtlaiah Addl DC Pi Ethel Rothangpuii MCS hovin neih a ni ang.

MR vaccine pek beihpui hi chawlhkar 5 chhung thlak a ni dawn a. A tir lam chawlhkar hnih chhung chu zirna inah hri danna hi pek phawt a ni ang a. Hemi hnu hian kar hnih dang chu vantlang tan sub-centre, anganwadi centre leh hmun remchang dangah te pek a ni leh ang a. Chawlhkar nganaah chuan target phak loh dan azirin a nawlpui thual nawn leh a ni ang. Lawngtlai District chhungah hian thla 9 leh kum 15 inkar naupang 42532 target niin, target hi zaa za (100%) tihlawhtling tura hma lak tum a ni.