Vawiin khan Health & Family Welfare Department Minister Pu Lal Thanzara leh Mizoram Journalist Association memberten Mizoram Institute of Medical Education & Research an tlawh a, MIMER hmalakna kalmekte thlir hovin inkawmna hun an hmang.

Health Minister Pu Lal Thanzara chuan May Ni 25, 2018 khan Ministry of Health & Family Welfare, Govt. of India in Medical College hawn phalna, Letter of Permission kan dawng tawh, a ti a, Academic year 2018-19 atang hian MIMER ah MBBS seat Za awm tura ruahman niin, 15% chu Central atanga hnawhkhah tur a ni anga, 15% dang leh chu Non-Resident Indian (NRI) atan a ruahman ni bawk in, a bak 70% chu Mizoram tan a ni ang, a ti. Pu Lal Thanzara chuan MIMER tih puitlin a nih theih nana Sawrkar hmalakna kalchhoh dante a tarlanga, 2014 leh 2015 khan Medical Council of India in Medical College Mizorama din ve tura dilna a lo hnawl tawh hnuah Sawrkar in hma nasa taka lain 2016 khan dilna theh luh leh a ni a, MCI lam atangin vawi engemawzah endik anih hnuah Letter of Permission kan dawngta hi Sawrkar hmalakna leh thawktute thawhrimna vang a ni, a ti bawk.

Minister Pu KS Thanga, Bialtu MLA ni bawk chuan thusawiin MIMER chu Mizoram tana hriselna leh damlo inenkawlna kawnga hmanraw tangkaitak anih bakah Falkawn leh a chhehvel mipuite tan enzawnna kawngah hmasawnna tamtak thlen tu a ni chu a lawmawm hle, a ti a, Letter of Permission hmu thei a Mizoram Sawrkar hmalakna leh MIMER a thawktute thawhrimna leh inpekna chu fakawm a tih thu a sawi bawk.