No.988/2020-2020

Aizawl, the 11th May 2020 : Vawiin khan Health & Family Welfare Minister Dr. R Lalthangliana leh Chief Secretary Pu Lalnunmawia Chuaungo hovin SAD Conference Hall MINECO ah state danga tangkhang mek Mizorama lo haw tur te inkhunghranna tur kaihhruaina dan siam tawh an thlir ho a. COVID-19 hripui in nunphung a tihdanglam karah nunphung pangngaia khawsak theih dan kawng awm thei te pawh meeting ah hian sawiho a ni bawk.

Dr. R. Lalthangliana chuan Pathian hruaina leh Chief Minister remhriatna zarah Mizoramin COVID-19 dona kawnga tun thlenga hma a lakna te chu a tha hle nia a hriat thu sawiin, India ramah Airport-a screening ti hmasa ber kan ni a, inkharkhip pawh ram pum inkharkhip puan a nih hma in kan kalpui tawh a ni, a ti. Sawrkar in Kohhrante, tlawmngai pawlte leh mipui atangin thawh hona tha tak a hmuh thu sawiin, an tawiawmna tha tak nen COVID-19 dona chu kil tin atangin theihtawp chhuaha beih mek a nih thu a sawi. Chanchinbu leh Cable TV, DDK leh AIR ten Sawrkar hmalakna puanzar kawnga theihtawp an chhuahpuinaah lawmthu a sawi bawk a ni.

Health Minister chuan COVID-19 hian eng chen nge min tih buai dawn tih hi sawi lawk theih nilo mahse kawng engkimah mipui te kan fimkhur a, social distancing te, hmaituamna hman te, kutsil uar te leh khawlaia chil chhak loh kan ngaih pawimawh a tul mai bakah heng zawm lo te chu dan anga hrem zel an ni, a ti a. Tun tuma lo haw tur te khunghranna chu fimkhur taka kalpui a tul tih sawiin kan fimkhur loh chuan tun thlenga kan thil tha tih hi a vaw chhe leh vek thei a ni tiin, lo haw tur te chu inkaihhruaina dan engkim uluk taka zawm turin a chah a. Tangkang chungchang a sawinaah Minister chuan India ram pawna tangkhang mek Mizote chungchang pawh Union Health Minister Dr. Harsh Vardhan hova Video Conferencing an neih tumin a thlen tawh thu a sawi bawk a ni.

Chief Secretary Pu Lalnunmawia Chuaungo chuan nizan thlenga Mizorama lo haw tur inziaklut chu 8450 a nih thu leh an haw dan tur ruahmanna tlangpui a report a. Sawrkarin Quarantine Facilities a neih zawng zawngah lo haw tur te an leng vek dawn lova, chu mai bakah hmun khata mi khunghran hi a risk a san avangin mahni in lama inkhunghranna nei te chu Village/Local Level Task Force te hriatpuina in Home Quarantine phalsak an nih tur thu a sawi a. Quarantine-na tur atana sawrkarin Hotel a thlansaah pawh an duh chuan man chawia Quarantine theih dan Sawrkarin a ruahman mek thu a sawi bawk.

Chief Secretary chuan inkharkhipna in state economy a ti thuanawp tih sawiin fimkhur taka nunphung pangngai kalpui a tul dawn a, kawng engkimah kan fimkhur mai bakah upa lam leh natna benvawn neisa te leh naupangte uluk tak kan ven a ngai dawn a, kan nunphung pangngaiah inthlakna “behavioural change” kan neih a tul dawn a ni, a ti.

Indian Medical Association (Mizoram Chapter) President Dr. Rosangluaia chuan COVID-19 hripui chu mitinin kan nunpui thiam a ngai dawn niin a lang a, a theih chin china kan him theih nan kan nunphung pangngai te kan thlak a tul dawn a, kan inzirtir a ngai hle dawn a ni a ti a. IMA leh MGDA Medical Team in Partial Lockdown neih mekah an thil hmuh dan leh tan lakna tur te a sawi lang bawk a. Mizoram Government Doctors’ Association (MGDA) President pawhin nunphung neihsa thlak danglam “behavioural change” a tul tiin, mipuiah hemi chungchang inzirtir a pawimawh thu a sawi a ni. COVID-19 Medical Operational Team member meeting a tel te pawhin Home Quarantine chungchanga an ngaihdan an sawi bawk a ni.

Meeting chuan mipui inzirtirna atan Police-in kawtthler fangin mobile announcement kalpui se; Zarkawt, Dawrpui leh mipui tamna hmun dangah te patrolling leh awareness a tam thei ang ber neih nise tih te leh Kohhran Hall te Quarantine Facility ah hman theih dan Kohhran hruaitute nen indawr nise, Home Quarantine a awm tur ten dan in a phut zawng zawng an tlin em tih te leh anmahni vil dan tur te rel a ni.

Meeting ah hian Home Secretary; Health & Family Welfare Secretary; Task Group on Quarantine Facilities, Task Group on Migrant Workers & Stranded Travellers leh Task Group on Commodities & Transport a Chairperson theuh te bakah Health & Family Welfare, Home, Disaster Management & Rehabilitation Department senior officials te an tel a ni.