Vawiin khan Health Minister Pu Lal Thanzara hovin Synod Office-ah Mizoram Synod hruaitute leh Mizoram State Aids Control Society (MSACS) hotute thukhawmin Mizorama HIV/AIDS darh zel tur venna kawnga hmalak dan tur an sawiho a ni.
Health Minister Pu Lal Thanzara chuan Synod inkhawmpuia HIV/AIDS harm reduction sawifiahna lehkhabu sem an phalsak leh Serkawna Baptist Pastor Conference-a HIV/AIDS chungchanga inkawmhona an nei chu lawmawm a tih thu sawiin Kohhran hruaituten HIV/AIDS beihna kawngah tha taka an lo dawngsawng thin chu lawmawm a tih thu a sawi a. Health Minister chuan Synod khawmpui hnuhnung berin HIV/AIDS darh zel tur ven nan hmalak ni rawh se, ti a thu a pass leh hemi kawnga hma a lak tawhna te lawmawm a tih thu sawiin chumi rual chuan ram hmasawnna ti thuanawp thei, hnam hmelma HIV darh zel tur bei tura sawrkar leh Kohhrante tan ho a pawimawhzia a sawi a. Mizoram chu population percentage a chhutin India ramah HIV/AIDS vei, positive tamna ber a ni ta chu pawi a tih thu leh Kristian tamna ber state tih atan chuan a inhmehloh thu a sawi bawk a. Pu Lal Thanzara chuan Mizo ringtute zingah Kohhran chuan platform tha tak neiin duh zawng leh duhloh zawng inzirtirna chak taka kalpui thei tu anih angin , mipuite hnenah he natna hian eng ang chiahin nge kan ram min run mek dan leh kan do dan turte in hrilhhriat thar zel a, engtinnge tun aia nasa zawkin he natna hlauhawm tak hi kan do tlan ang tih ngaihtuahpuia, a tul huna finchhuah turin a sawm a ni.
He hunah hian Synod Social Front aiawhin Rev B. Sangthanga’n Social Front ina HIV/AIDS do na kawnga a hmalak tawhna te a tarlang a. Training Module, mipat hmeichhiatna kawnga fihlim tur leh kawppui nei tawhte tana rinawm tura intiamna “pledge card” te buatsaihin AIDS awareness drama, cartoon comic, seminar, awareness campaign-te leh AIDS chungchanga kaihhruaina bu-te anlo buatsaih tawh thu a sawi a. Hma lak zel dan tur rel ala nih tur thu a sawi bawk a ni.
He hunah hian MSACS Project Director Dr. Lalmalsawmi Sailo chuan HIV/AIDS chungchanga Mizoram dinhmun te sawifiahin presentation a pe a. Tun dimhmunah Mizoramah HIV+ zingah kum 25-34 inkar an tam ber a ti a, amaherawhchu tunlaiin drugs a hluar em avangin kum 15-24 inkarah AIDS vei an tam chak hle, a ti. MSACS Project Director chuan Tun dinhmuna ART (Antiretroviral Therapy) la mek zinga 48 % chu kawppui (nupui/pasal) nei lai an nih thu a sawi a. Financial year kal mek 2017-18 ah hian HIV/AIDS vei mi 1505 hmuhchhuah thar a nih thu sawiin nitin mi 5 aia tamin an kai thar ang vel a ni, a ti bawk.
Inkawmhona hun hi Synod Moderator Rev F. Lalrinnunga’n a kaihruai a, Synod OM memberte, Synod Social Front leh MSACS hotute an tel kim hle a, HIV/AIDS chungchanga hmalak tawh dan te leh tan lak leh zel dan turte an sawiho a ni.
