Vawiin khan Pu Lalrobiaka bialtu MLA ZIDCO Chairman ni bawk chuan a bial Dampa Constituency a fang tan a, W. Phailengah KTP general conference neihna tur pandal a tlawh nghal bawk.

Bialtu MLA hi W.Phaileng Dinthar kawn Bazar shed-ah khawtlang hruaitute'n lo hmuakin amah lawmna programme Pu Lalhmingliana BDO W.Phaileng kaihhruaiin an siam bawk. Pu Lalrobiaka chuan thu sawiin a bial chhunga hmasawna hmuh tur a awm chho mek zel chu lawmawm a ti a, tunhma W.Phaileng a tui harsatna pawh sutkian tawh niin tunah chuan kan in ngeiah tui kan herh haw thei tawh a ni a ti. W. Phaileng hospital building sak hna pawh kalpui a ni a, nakin lawka hospital changtlung tak ni turin sorkar chuan hma a la mek zel a ni a ti bawk. Sorkar chuan kuthnathawktute hmakhaw ngaiin kuthnathawktute chawikanna tur hian NLUP mai bakah NEDP hnuaiah theihtawp a chhuah mek zel a. Tunah pawh hian NEDP kaltlangin Belleikawn to Helipad inkar leh Tourist Lodge to PHC Road chu black top mek a ni thu a sawi a. Dintharkawn to SDO(C) Complex leh PHC panna kawngpui pawh siamthat hna thawh mek anih thu a sawi. Ram hmasawnna tur chuan remna leh muanna a pawimawh ber a. Kan GSDP pawh tunah hian kan ram India pumpui aiin kan sang zawk a,  kan thenawm state keini aia statehood chang hmasa zawk Manipur te aiin kan hmasawnna hi hmuh theihin a awm mek a ni a ti.

Pu Lalrobiaka hian thla thara neih tur Central KTP General conference pandal a hmunah tlawhin Conference Organising Committee te nen inkawmna hun tha tak an nei. Committee member te hian inbuatsaihna an kalpui mek dan leh an harsatnate an lo thlen a ni. P&E , PWD , PHE bakah Police leh SDO(C)-ten a theih ang anga conference hlawhtling taka kalpui a nih theih nan an hmalak dan organising committee te nen hian an sawi a ni.

Dampa bialah hian hmunphiah atangin cheng Nuai 19 hmuh a ni a. A bial chhung khawtinah bialtu MLA hian khawtlangin chhiat leh thata an hman turin Tarpaulin leh Games and Sports Association hnenah Football leh Volleyball a hlan bawk a ni. PMGSY hnuaiah Chhippui leh Kawnmawi inkar siamna tur estimate pawh siam mek  niin thawh tan thuai a ni dawn bawk a ni a ti. Taihmakna, dawhtheihna, rinawmna bakah tih hram hramna te hian kan hlawhtlinna tur a hril a ni a ti bawk.

Pu Lalrobiaka, Bialtu MLA, Chairman ZIDCO hian tun Inrinni thleng a bial chhung khaw hrang hrang Kawnmawi, Chhippui, Lallen, Saithah, Phuldungsei, W. Phulpui, Pukzing, Marpara, Bekabekya, Hruiduk, Silsury, Hnahva, Pukzing vengthar leh Parvatui te a tlawh chhunzawm anga, inkawmhona hun leh Public Meeting neih thin a ni dawn a ni.

Pu Lalrobiaka hi Addl. DC Mamit, ZIDCO General Manager, EE PWD, EE P&E, SDO PHE , DO Soil Mamit-te bakah khawtlang hruaitute'n an tawiawm a ni.