Kum tina ram pum huapa hman thin National Consumer Day chu vawiin chhun khan Commissioner, Food Safety, Government of Mizoram leh Mizoram Consumers Union te tangkawpa huaihawtin I&PR Auditorium ah neih a ni a, Health Minister Pu Lal Thanzara’n a hmanpui.

Minister chuan thusawiin Sawrkar Laipuiin mipuite (consumer) te hriselna ngaipawha mitin hriselna vawn nan dan tha tak - Food Safety and Standards Act, 2006 leh Rules & Regulations 2011 a siam tawh thu te a tarlang a, National Consumer Day thupui atan pawh ‘Safe and Healthy Food : Combating Food Adulteration’ (Ei/In thianghlim leh hrisel : Ei/In thianghlim lo do) hman a ni, a ti. Ei leh in thianghlim vawn leh kenkawh chu mitin nghawng, mitin mawh a nih thu te sawiin kan fimkhur tlan a ngai a ni, a ti a; ei leh in thianghlim loh vangin khawvel pumah kum tin mi maktaduai 2 velin nunna an chan phah thin thu a sawi lang bawk. Changkanna leh hmasawnna tehna pawimawh tak chu ei leh in thianghlim kan hmuh phak leh phak loh hi a ni tiin Minister chuan Mizoram Sawrkar pawhin theihtawp chhuaha hma a lak mek thu te a tarlang a, Sawrkar leh mipui leh ei leh in lama sumdawngte kan thawhho that a tul hle a ni, a ti bawk. Mizoram chu ramdang nena inri a nih avanga ei/in chi hrang hrang rawn lut thin te pawh kan fimkhur a pawimawh a ni tiin Pu Lal Thanzara chuan hemi kawnga tan la theuh turin mitin a sawm a. Mipuite kan hrisel chuan ram a changkangin hma a sawn thin tiin ei/in kawngah mitin fimkhur theuh turin a chah bawk a ni.

National Consumer Day programme hi MCU Gen. Secretary Dr Chawngsailova’n a kaihruai a, Pu Thanglura, President MCU & Member, Food Safety & Standard Authority of India leh Dr K.Ropari, Commissioner of Food Safety & Principal Director, H&FW ten thusawina hun an hmang bawk a, Food Safety Cell, H&FW Dept.-in ei leh in thianghlim vawn leh kenkawh lama hma an lak dan te sawifiahna presentation an hmang bawk a ni.