Vawiin chawhnu ah khan Video Conference kal tlangin President of India Pu Pranab Mukherjee chuan India ram state leh U.T. a Lt. Governor te chu Rashtrapati Bhavan atangin conference a neih pui . He hunah hian Mizoram Governor Lt.Gen(Rtd.) Nirbhay Sharma pawh a ma Office, Raj Bhavan atang in a tel a ni.

He video conference hi Doyen of Governors, Pu E.S.L. Narasimhan, Governor of Andhra Pradesh & Telegana in a kaihruai a. President in Governor leh Lt.Governor zing a thusawitu tur mi 6 a thlan chhuah zinga tel, Mizoram Governor Lt.Gen(Rtd.) Nirbhay Sharma chuan Mizoram mamawh leh hmarchhak mi te tana pawimawh nia a hriat te President hnenah hian a thlen a ni.

President Pu Pranab Mukherjee chuan Governor te chu India ram hmasawnna atan Constitutional Head an nih na hrechiang a, tha taka Judiciary, Legislatures leh Executives te thawhpui zel turin a chah a. Kum liamta ah khan India tan lawmna tur tam tak a awm tih tarlang in Agriculture sector bik erawh chuan fur ruahtui a tam loh avangin duhthu a sam lo a ni a ti a. Kum 2016 chhung hian India chuan hmasawn tam tak a nei dawn a, he hlawhtlinna atan hian Centre leh states tanrualna a pawimawh hle dawn a ni tih a sawi a. Governor te chu an chenna Raj Bhavan te chu smart Raj Bhavan ah siam in an enkawl state theuh te pawh smart state ah siam tur in a chah a. Kum in February thla a neih tur Governor’s Conference atan inpuahchahna nei tan tur leh an state tan rawtna mumal tak rawn siam thei theuh turin Governor te chu a chah bawk a ni.

Thusawina hun neitu zinga telh a nih angin Mizoram Governor Lt.Gen(Rtd.) Nirbhay Sharma pawh in President chu Lirnghing thlen theihna hmun then hrang hrang zinga hlauhawm ber, seismic Zone V a awm, Mizoram leh India hmarchhak state ah nasa zawk ah mipui te him dan tur kawng dap a pawimawh thu a hrilh a. Aizawl khawpui, Mizoram mipui za zela 25 chuang awm na pawh a him tawk lo hle tih hrilh in Disaster audit siam a nih theih nan Central sawrkar in hma la se a duh thu a tarlang a ni. He thil hi thil hmanhmawh thlak a nih avangin Governor’s Conference neih hunah Agenda ah telh a nih theih nan President chuan pawmsak se a duh thu a tarlang a ni.

Inkalpawhna chi hrang hrang bakah inbiak pawhna chi hrang hrang ah Mizoram leh hmarchhak an hnufual bik tih sawiin nasa zawka central in hma a lak a tul thu President hnenah hian thlen in Kaladan Multi Modal Transit Project in hma sawn chak loh thu pawh a tarlang a. MoRTH, MEA leh State aiawh te telna Monitoring Committee din a nih chuan he harsatna hi sutkian theih a nih thu President hi hrilh in hmalak pui tur in a ngen a ni. Mizoram chu India ram state zawng zawng zingah ramngaw nei tha ber a nih avangin duhsak a phu tih tarlang bawk.

President hova Video conferencing neih ah hian state 31 a Governor te leh U.T. 7 Lt.Governor te an tel a ni.

Governor paruk ten thu an sawi zawh ah President Pu Pranab Mukherjee chuan thu sawina hun hmang leh in Video Conferencing hi tih tawp a ni.