Mizoram Pharmacists’ Association General Conference cum National Pharmacy Week 2014 vawi 53-na, Tourist Lodge, Chaltlang-a neih chu vawiin khan Health Minister Pu Lal Thanzara’n a hmanpui.
Minister chuan Zoram mipui hriselna enkawlna kawnga Pharmacists te thawh hlawk zia leh an mawhphurhna san zia te sawiin ram leh hnam tana an rawngbawlna ah thahnemngai taka thawk chhunzawm zel turin a fuih a. Rethei harsa zawkte hamthat nana Mizoram Sorkarin Chief Minister Free Medicine Scheme a kalpui chhoh mek turah theihtawp chhuaha tawiawm turin a sawm bawk. Health Department hnuaia thawk te chu mihring nunna khawih an nih avanga hmangaihna nen damlo enkawlna kawngah thawk thin turin a fuih a, mualphona tawk thei reng an nih hre renga fimkhur taka thawk thin turin a chah bawk. Mizoram ah damdawi tha lo leh him lo tam tak a rawn luh mek lai hian Pharmacist te chu damdawi vil tha lehzual turin a chah a, Medicine Testing Laboratory din tura hmalakna a la hlawhtling thei lo chu pawi tiin Minister chuan a hlawhtlin ngei theih nan Health Department hotu te chu chak zawka lo bawhzui turin a chah bawk. Damdawi thalo veng turin Sorkar pawh khauh zawka kal turin hma lak mek a nih thu a puang bawk. Pharmacist thiamna nei lo, dawr nei si, hlawkna sum ringawt um te avanga ruihtheih damdawi tawlhruk avanga Mizoram hming a chhiat mek chu pawi tiin Ministar chuan hemi dona kawnga nasa zawka tan la turin Pharmacist kalkhawmte chu a fuih bawk. An awmna hmun theuhvah damlo leh mamawhtu te tana rawn tlak leh rawn theiha awm zel turin Minister chuan Pharmacist te chu a chah bawk a ni.
National Pharmacy Week hmanna ah hian Mizoram Pharmacists Association President Dr H.Lalhlenmawia leh Mizoram State Pharmacy Council President Pu Lalsawma Pachuau te pawhin thu an sawi a, India ram chu khawvela damdawi siam tam ber 3-na a nih mek thu leh damdawi thar a chhuah reng avanga Pharmacist te chu an inzir thar zel a pawimawh thu te an tarlang a. Mipui te tana damdawi hman tlak chhawpchhuah chu an mawh a nih thu te sawiin Mizorama damdawi hmansual hluar ta em em chuan ram hnuk a khawih ni-a sawiin kohhran leh khawtlangah pawh sawi tam a pawimawh thu te an sawifiah bawk. Thenawm state leh khawchhak ram atanga ei tur chi hrang hrang lo lut te endik nana Thenzawl ah Food Testing Laboratory din tura hmalak mek a ni chu lawmawm an tih thu an tarlang bawk.
Pharmacy Week hmanpuitu Dr K.Ropari, Principal Director, Health & Family Welfare pawhin thu sawiin Pharmacist tel lo chuan medical team an kim lo, a ti a. Damdawi hriatchian loh ei chu damlo tan a hlauhawm a, damdawi ei dan tur dik damlo te kawhhmuh chu Pharmacist te mawh a nih thu te leh damdawi dawr te ngun lehzuala vil a tul thu te a sawi lang bawk.
53rd National Pharmacy Week thupui ah hian ‘Dik taka damdawi hman : Pharmacist te mawhphurhna’ tih hman a ni a, Minister hian The Mizoram Pharmacists magazine 2014-2015 a tlangzarh nghal bawk a. Dr K.Ropari chuan RIPANS-a B.Pharm zirlai titha ber John Roulthanlien Khongsai hnenah SL Sailo Pharmacy Award a hlan bawk a ni.
