Vawiin khan Health Minister Pu Lal Thanzara chuan AIKO(NGO), Mizoram State Social Welfare Board leh Mizoram State Legal Services Authority tangkawpin I&PR Conference Hall-a Pseudoephedrine (Methamphetamine) zirchianna leh sawihona hun an buatsaih chu a hmanpui.

Health Minister chuan pseudoephedrine tawlhru thintute chu hnam hmelma an ni a, mumal zawka khuahkhrih turin Police leh Excise hmalakna mai bakah Mizo mipui zawng zawng kan pawimawh a ni, a ti a. Drug license pek chhuah chungchangah fimkhur lehzual a pawimawh thu leh, NDPS Act hnuaia heng ruihhlote khuahkhirh dan fel taka awm chu mipui tam zawkin kan hriatchian theih nan Sorkar, kohhran, tlawmngai pawl hrang hrang leh zirna in te bakah thuthar thehdarhtute tan tlan a ngaih thu Pu Lal Thanzara chuan a sawi a ni.

Vawiin hun hi Pi Zothankimi, MSSWB Chairperson chuan kaihruaiin, mithiam sawm bik atang ten chipchiar takin psedoephedrine chungchang ngaihthlak a ni a. Pu Zothanpuia, Asst. Professor, Department of Pharmacy, RIPANS chuan mihring taksa a he damdawi hi a thawh dan leh, hmansual vanga chhiatna a thlen dan te a sawifiah a. Pi Lalnghahmawii, S.I, Excise & Narcotics Dept. hnen atangin ruihlo tawlhruk leh man dan chungchangte ngaihthlak a ni a. Ruihhlo man theihna Dan “The Narcotic Drugs and Psychotropic Substances (Regulation of Controlled Substances) Act, 2013 chungchang sawifiahna Pi Lucy Lalrinthari, Special Judge, NDPS atangin ngaihthalk a ni bawk.

Vawiin hunah hian Sorkar department hrang hrangte, media lam te, kohhran hrang hrang aiawihte, MHIP, MUP, MZP leh tlawmngai pawl dangte an tel a. Sawihona hun tha tak hman a ni.