Vawiin chawhnu khan UD&PA Minister Pu Zodintluanga chuan Bungkawn YMA Hall ah Mizoram Rural Bank branch 75-na, Bungkawn Branch MRB a hawng. Hawnna puala inkhawm tawi buatsaih hi Mizoram Rural Bank(MRB) hotuten kaihruaiin Pu Vanlalzawma, bialtu MLA pawh he hunah hian a tel a ni.

Bungkawn Branch Rural Bank hi Aizawl khawpui chhunga branch 15-na niin Mizoram pumpui ah Branch 75-na a ni a, tunah hian Branch 76-na hawng leh tura hmalak mek a nih thu MRB hotute chuan an tarlang. Tun dinhmun ah Mizoram Rural Bank hi Mizoram a Bank hrang hrang zinga mipui hnena loan pe chhuak tha ber te zinga mi niin account hawngtute hnen atanga an pawisa hmuh 100 zela 48.03 lai loan an pe chhuak a ni. Mizoram a Civil sub-division leh RD Block zawng zawng ah te inzar pharh tawhin Core banking leh banking technology sang ber ber te hmangin MRB hian hna an thawh thu an tarlang a. State leh Central sawrkar hmalakna pawimawh tak tak ah te nodal bank leh implementing agency an nih thu te tarlan a ni bawk.

Bungkawn Branch MRB hawngtu Minister Pu Zodintluanga chuan Bank a hnathawktute chu mipui rawngbawltu leh sumdawng an nihna hre reng chunga hawihhawmna leh fimkhurna nena anmahni dawrtute lo chhawn thin turin a chah a. Mipui tam zawk te hi Bank leh loan chungchang ah zirtirna pek ngaite kan la nih avangin Bank dawrtute zirtir leh thurawn pekna kawngah Bank a thawkten mawhphurhna lian tak an nei a ni a ti a. Loan chungchang bikah phei chuan an fimkhur leh zual a ngai a ni a ti. Loan hrim hrim lak duh leh rulh ngei ngei a ngai a ni tih a chiang si lo tam tak an la awm avangin Loan la duh nazawng te chu an phurh zawh loh tur leh an rulh theih loh tur loan kawhhmuh ringawt te hi thil pawi tak a ni thei a. Loan laktumte hrechiang hmasa tur leh an hmang tangkai dawn em tih te leh an hlawkpui dawn em tih hriatchian hmasak chu Bank hnathawkte mawhphurhna pawimawh tak a ni a ti.