Vawiin khan Health Minister Pu Lal Thanzara hovin State Supervisory Board under Pre-Conception & Pre-Natal Diagnostic Technique (Prohibition of Sex Selection) Act 1994 chu CM’s Conference Hall-ah thukhawmin an hmalakna hrang hrang report ngaihthlak a nih bakah hmalak zel dan tur an sawiho. He meeting-ah hian Fisheries Minister Pi Vanlalawmpuii Chawngthu, Health Commissioner Pu Lalrinliana Fanai bakah Board Member-te an tel a ni.
Pre-Conception & Pre-Natal Diagnostic Technique (Prohibition of Sex Selection) Act 1994 hnuaiah nu naupaite chuan ultrasound hmanga an naupai lai mipa nge hmeichhia tih enlawk phal a ni lova, hetianga titu nu leh pa bakah ultrasound khawihtu doctor/technician te chu Danin na takin a hrem thei a ni tih Meeting-ah sawi a ni a. He Danin a phut angin sorkar leh private hospital, helath centre leh clinic ten dan an zawm tha em tih endik tura district tina kal Inspection Team te report ngaihthlak a ni bawk. Chu bakah phalna la hmasa lova ultrasound lo lei ringawt, registered bawk si lo, heng khua - Bungtlang ‘S’, Lungsen, Khawbung leh Khawzawl - ami te chu Health Directorate ah an khawlte chu dahlet tura hriattir a ni tawh a, hei hi Dan kalh a nih avangin hman zel phal a ni lo tih report-ah sawi a ni.
Health Minister chuan state chhunga hospital, health centre leh clinic te endik tura National Inspection & Monitoring Committee an lo kal hmain registered lo ultrasound awmna centre apiangte register vek tur te, phalna la hmasa lova ultrasound lei zawng zawng lakkir te, ultrasound hmang tur apiangten ‘Form F’ fill-up ngai pawimawh turin nasa lehzuala tanlak a ngaih thu a sawi a. Pre-Conception & Pre-Natal Diagnostic Technique (Prohibition of Sex Selection) Act 1994 bawhchhetute Danin a hremna a na em em a, bail theih loh (non-bailable offemce) a nih bakah sum tam tak chawi leh kum 5-6 lung in tan ngei ngeina a nih avangin mipuite bakah ultrasound khawihtu lamte pawh inhrilhhriat nasat lehzual a ngai a ni, a ti. Kohhran Hmeichhia leh NGO lam ten an magazine-a chhuah turin Nodal Officer ten thu/article ziaka pe turin a hrilh bawk.
Fisheries Minister Pi Vanlalawmpuii Chongthu pawhin rampumah he Dan hi strict taka kenkawh mek a ni a, chuvangin Mizoramah pawh ultrasound khawihtu radiologist/gynaecologist/MBBS doctor te tan training leh sensitization buatsaih nise; National Inspection Team lo kal hma ngeiah an mittlung turin tihfel ngai zawng zawng tifel turin Nodal Officer leh a kaihhawih official-te a chah.
State Supervisory Board hi thla 4 chhungin vawi 1 an thukhawm ngei ngei tur a ni a, an hmalaknate thlirho thin a ni. Tun dinhmunah Mizoramah registered ultrasound centre 50 a awm mek a, kumin chhungin registration thar 6 leh registration renew 7 pek an ni. Ultrasound khawih theih tura training leh exam buatsaih reng a ni a, tunah hian training mek 1 a awm bawk. Ultrasound hmang turte chu Form F fill-up ngai pawimawh turin mipuite leh medical lam te pawh hrilhhriat vek turin an rel bawk.
