Tun kum Krismas leh Kumthar vuakveta Police-te chuan mipui him tlan theih nan dan bawhchhiate an awm leh awm loh uluk taka check-in hma an la mek a. He hmalakna hnuaiah hian ni 19.12.2017 zan khan khawpui chhunga lirthei veivak checking neiin Traffic dan bawhchhia mi 93 man a ni a, heng zinga mi 17 te chu zu rui chhunga motor khalh an ni. Heng dan bawhchhiate an man atanga pawisa chawitir tlingkhawm zat chu Rs.57,400/- a ni.

Krismas leh Kumthar atana chakkhai lama khualzinte an him tlan theih nan uluk taka checking neih thin a ni a, khualzin phur motor driver te chu khawdaiah zu an ruih leh ruihloh Breath Anaslyser nen uluk taka lo check thin a ni bawk.

Temporary Police Beat Post chu Rangvamual-ah naktuk ni 21.12.2017 hian hawn a ni dawn a, hunpui chhung zawnga duty tura ruahman a ni. Heng bakah hian ni 11.12.2017 atang khan khawpui daiah zanlam Police Mobile Patrolling uluk takin an lo kalpui tawh bawk a ni.