Vawiin khan Little Free Library, New Market Office, Dawrpui, Police Beat Post bula mi chu Pu R. Hmingthanzuala, Director, Art & Culture Department chuan a hawng. He library hi India ramah chuan Mumbai, Chennai leh Bangalore-ah te awm tawhin, Mizoram hi a palina a ni.

Hawnna inkhawmah hian Pu R. Hmingthanzuala, Director, Art & Culture Dept. chuan he Little Free Library hian mipuite tan kawng tha kawh hmuhtu a lo nih a, finna kailawn atan hmang tangkai turin a duh thu a sawi a; LFL hi a awmna hmun hnaia miten awlsam taka lehkhabu chhiar tur an hmuh theih nan leh an hman tangkai theih nana din a nih thu leh New Market-a ni tin eizawngtuten tangkai taka an hman a beisei thu a sawi bawk.

Little Free Library hi Non-Profit Organisation a ni a. United States mi, Todd Bol an kum 2009-a a din tan niin khawvel pumah LFL 50,000 a awm tawh a. Vawiina Dawrpui a mi hawn tak bakah hian Mizoram University Park-ah hawn a ni bawk. Little Free Library-a lehkhabu hawh tur hian member nih a ngai lo a, a duh leh mamawhtu apiangin a thlawna an hawh theih tura ruahman a ni. Lehkhabu hawh chhuaktuten an chhiar zawha dah kir leh thin tur a ni.