No.3222/2021-2022

Aizawl, 1st December, 2021 : Tukin khan Mizoram State AIDS Control Society (MSACS) bultumin World AIDS Day Rally (kawngzawh) neih a ni a. he hun hi Health Minister Dr R. Lalthangliana’n hmanpuiin, Vanapa Hall atanga Millenium Centre thleng kawngzawh a ni a, Millenium Centre tualzawlah inkhawmna hun tawite hman a ni. Kawngzawhnaah hian MSACS leh a thawhpui NGO hrang hrang bakah mithahnemngaite an tel a, kawngzawhnaah hian AIDS chungchanga inzitirna chi hrang hrang banner leh poster te tarlan a ni a. New Delhi atangin National Centre for Disease Control (NCDC), iTech India leh AIDS Healthcare Foundation (AHF) India Cares hotute an rawn tel bawk a ni.

Millenium Centre tualzawla inkhawm buatsaihah Health Minister Dr R. Lalthangliana chuan thu sawina hun hmangin Mizoram a AIDS vanga nunna chan tawh zawng zawngte sunna thu leh an chhungte an tawrhpui takzet tih a sawi a, Mizoram-a he natna kai tharte hi a tlangpuiin kum 19 – 49 inkar an nih ber thu tarlangin a kai awm renga kan ngaih thin (high risk group) ruihhlo bawiha tangte, mipat hmeichhiat kawnga buan chaklote chang ni lovin mipui nawlpuiah a thleng tawh a, hei vang hian mi zawng zawngin tan kan lak tlan a ngai a ni, a ti a. Mizoram kan vanneih bikna sawilangin kan thiante, kan unaute he natna veite hmangaihna leh lainatna kan nei a, an tana kan tawngtai thin bakah a taka che chhuak thin kan tam a, MSACS hian amah maiin a bei thei lova, NGO kan thawhpuite leh kohhran, khawtlangte nena kan tanho thinna hi a hlu takzet a ni a ti a, AIDS veite thinhrik mai lova, anmahni ngaihsakna nen AIDS vei thar awm tawh lohna ram ni turin kan tanrual a ngai hle a ni a ti.

Health Minister hian HIV kai ten an kai nite hmuhchhuah a nih a, an HIV dinhmun an hriat nan leh chak zawka hmalak a nih theihna tura NCDC leh MSACS ten “Index Testing” an kalpuina tur programme a hawng nghal bawk a ni.

Health & Family Welfare Department Secretary Pu R. Lalramnghaka pawhin thusawina hun hmangin COVID-19 hripui nasa taka kan do mek lai hian HIV/AIDS kan dona hi kan tithuanawp thiang lo tih sawiin, kan dinhmun hi kan inhriatchian poh leh thla a muang lova, HIV/AIDS phei hi chu kan taksaah a hrik a luh tawh chuan tihdam theihloh a nih vang hian a inven lam kan ngaih pawimawh leh zual a ngai a ni a ti a. “Love Brigade / Painting the Town Red Campaign” kaltlanga taxi driver-te hnena condom paina seat cover leh jacket sem chu mipat hmeichhiatna hman kawnga inthlah zalenna tur thil a ni lo tih sawiin, taxi driver te chu a theih ang anga an passenger te counselling pe thin turin a chah bawk a ni.

MSACS in an chhinchhiah danin Mizoramah HIV+ve mi 25,080 awm tawhin nunna chan mi 3294 an awm tawh a, HIV+ve mi 21,786 awm mek anga chhinchhiah a ni.

Vawiin World AIDS Day hmanna inkhawmah hian AIDS Healthcare Foundation (AHF) hmalakna kaltlangin Aizawl khawpuia Taxi Driver leh Two-wheeler taxi driver ten AIDS dona kawnga an hman tangkai tur hmanrua (two-wheeler taxi driver te tan jacket leh four-wheeler taxi driverte tan seat cover) sem a ni bawk. AIDS Healthcare Foundation (AHF) hian rally-a telte hnenah T-shirt, face mask leh lukhum an sem vek bawk a ni.